上個禮拜五睇到單新聞，消委會接到一啲消費者投訴，話一啲商戶要求客人碌卡簽賬時要畀手續費，又或者要買夠一定金額先可以碌卡。朋友睇完單新聞，即刻話，「一直都有收㗎啦，點解啲人家陣先去消委會投訴嘅？」
今時唔同往日，經濟好，大家自然疏爽啲，但上個禮拜，政府公佈今年第二季經濟增長得4.2%，比第一季7.3%明顯放慢，經濟唔好不特止，仲有高通脹，今年通脹預測就由之前估嘅3.4%，調高到4.2%。生活艱難人就自然變得斤斤計較。
經常看財經新聞的讀者，近期一定經常見到「滯脹」，即通脹高企但經濟負增長。其實類似嘅滯脹情況喺歷史上亦有出現過，敏妮近排就不斷摷吓啲歷史書睇，Mr.B問：「你認為歷史會重複？」唔一定，但參考當年類似嘅情況，就會畀到idea你嚟緊點部署。
從歷史學部署策略
星期六逛書局買咗本關於歷代投資大師嘅書，當中揭到某頁有個小標題──從通貨膨脹中獲利，敏妮俾呢個題目吸引住。70年代，美國亦進入咗滯脹時期，當時經濟持續惡化，投資者唔敢投資，但有一個人認為：「當別人最害怕時，你要變得貪婪。」當時一般投資者因為恐慌拋售股票，佢就不斷接貨，而且不斷回購自己公司嘅股票。
不過佢越買個市就越跌，手上股票市值跌咗超過一半，但佢好有信心，因為佢知道手上嘅股票未來都有升值潛能。講到呢度，大家都可能估到敏妮睇緊邊位投資大師嘅故事，冇錯就係股神畢菲特。
牛熊市均處之泰然
當然畢菲特唔係一話滯脹就合埋眼入市，但睇番呢啲歷史，就可以提醒自己，喺大牛市時唔好變得盲目，喺市況差時亦唔使太過沮喪。唔少投資大師贏嘅唔止係眼光，更重要係心態，可以經常保持平常心，作決定時勝算自然大。
http://wanmanli.com/blogs/