本星期二本欄寫「讀者講拆哪」，有一位讀者周先生來電郵回應。讀者周不同意朱小姐嘅講法。讀者周云：「『支那』是譯音，原無貶義。民初林紓譯大仲馬《茶花女》，一紙風行，上海報章報導其盛，便曾有一句『可憐一卷茶花女，斷盡支那蕩子腸』之標題。康有為次女康同璧獨訪印度，登上大吉嶺時賦詩一首，其中一句為『我是支那第一人』。『新中國』成立後，毛澤東特別安排接見康女士，引述詩句，讚康為女中豪傑。可見若『支那』有貶義，乃近人之『受歧視情意結作怪耳』。」
不知其他讀者同意否？
賓架Ｐ在酒會中誤認馮京作馬凉，稱呼滿頭白髮之社長Ｍ為羅拔Ｃ，後來發覺出錯，連忙道歉，罰自己請食餐飯，搵埋白頭羅拔與左丁山一齊，到占美廚房。賓架Ｐ在此有長枱，馬主Ｃ亦然，佢哋兩張枱剛好為鄰，來此見面唔使預約。社長Ｍ與羅拔各自白頭，坦白啲講，羅拔Ｃ嘅頭髮白得更徹底，更可愛，現在已有真的處長上班去了，疑似處長羅拔Ｃ似乎鬆了口氣，笑容更燦爛。
呢個時候，話題離不開選舉與奧運。選舉咁政治，不談也罷，只談京奧。左丁山問佢哋：「有報紙特登訪問觀眾話馬術好悶，你哋認為如何？」羅拔Ｃ話：「馬術其實講究人馬合一，有人睇，有馬睇，唔算悶。我以前到過現場睇跳水，咪仲悶，對眼離開運動員半秒，佢已經跳咗落水，我乜都睇唔到，只識拍掌，即使係金睛火眼吼到實，都只係睇到運動員嘅人影與水花而已，你話悶唔悶？」
賓架Ｐ係射擊發燒友，本想上京睇射擊比賽，但佢諗真啲，現場睇別人射擊一味見到運動員揸住枝槍，木無表情地向目標瞄準，觀眾悶到暈，睇電視直播，反而可同時見到中靶畫面，於是留港不上京。好多體育項目都係睇電視轉播好過在現場嘅，不過球類、游泳、田徑等等就在現場更興奮。左丁山睇咗幾晚馬術，愈睇愈過癮，全世界超級馬術選手雲集香港競技，乃空前絕後之舉，可一不可再，蓋茨，楊致遠都趕住入場，因為呢兩位科技大亨知道睇馬術一啲都唔悶。