「無人及我，你怎麼竟然說『友賽之王』，是我……」呢首改篇自Eason嘅歌，係熱刺啱啱同粉絲「沙冧」嘅時候唱嘅。喺季前贏到開巷嘅熱刺，俾波友封為「友賽之王」，但英超開鑼戰俾我哋名家牽牛貼中，1:2不敵米杜士堡，繼上季之後又再賴嘢！嗰邊巴塞又係喺熱身賽勁到癲，呢支西甲勁旅唔會同一命運啩？
上季頭炮負「黑貓」
由名帥拉莫斯領軍嘅熱刺，季前大搞買賣交易，球員in、out嘅新聞多過乜。哈，不過佢哋似乎換血成功喎，友賽贏完些路廸2:0、再贏多蒙特3:0，最勁嘅係開「咧」前大炒羅馬5:0，個勢冇人能及。好正路，熱刺英超首戰作客米杜士堡，又要讓平/半；球迷受到熱刺友賽成績薰陶下，好自然一窩蜂買上盤。
但係上盤客落注前一定係冇做功課，或者冇睇我哋波經喇，事關上季聯賽開鑼前，熱刺又係友賽勁到嘭嘭聲，點知首戰作客新特蘭，由初盤平手落飛落到讓平/半，最後就係賴嘢輸0:1。今季直頭好似《警訊》入面嘅「案件重演」一樣，強勢作客米堡，結果俾主隊嘅韋達及美度射爆，破蛋都只係靠對手賀夫擺老烏，最終熱刺輸1:2輸盤，真情係上季翻版一樣！
熱刺領隊拉莫斯賽後吹脹咁話：「我哋太多新球員加盟喇，季初需要建立默契嘛，俾啲時間我哋先得㗎！」嘩！嘩！嘩！之前友賽踢得咁勁，你又讚班球員默契好、把握勁？你呢番說話，真係答到「絕得不能絕，絕到溶掉我……」咯！
死啦，巴塞嗰邊又係贏到唔識停，周日友賽贏埋小保加2:1之後，連埋歐聯外圍賽，季前7戰全勝！唔知月底西甲揭幕戰作客升班馬紐文西亞，會唔會好似熱刺咁賴嘢呢？