上周五美元繼續升，商品期貨出現暴挫場面，個別商品跌幅驚人，以農產品為例，玉米、大豆及小麥期貨價格均大跌超過4%，令人想起還在早幾個月全球忽然爆發糧食危機，連一向唔多受炒家注意的大米價格都被炒高，當日囤積居奇的商家，現在應已嚐到苦果。
相比起農產品期貨，金屬期貨跌幅更勁，除金價創近9個月低位之外，銀價跌幅至得人驚，單日跌幅達一成，失守13美元，回落至06年水平。白銀呢種金屬一向落後其他金屬商品，金價狂升佢都唔升，金價要跌，佢就跌得特別多。
商品價格大跌，明顯地反映出之前商品價格狂升，好大程度係炒家所製造的現象，另一方面，某程度亦反映出全球經濟滑坡加速將難以避免。因此，理論上原材料價格下跌應有利工業股的成本下降，但同一時間定單減少，計落都係無着數。
經緯料第三季見紅
工業股經營環境有幾惡劣，睇上周五兩隻盈警股可見端倪。上周初曾因市傳會回台灣上市而炒高的富士康（2038）發出盈警通告，指由於產品組合有變、營運成本上升、研發活動及生產設施的長期投資增加，以及所得稅支出上升，公司截至今年6月底止中期純利，將按年明顯下跌。
至於經緯紡機（350）更預告今年第三季度出現業績虧損，主要因為國家緊縮銀根及人民幣滙價持續升值，令內地紡織行業需求下降，踏入08年以來，公司各主導產品的內地銷售量大幅減少。工業股不知幾時才度過嚴冬。