今屆奧運喺得北京舉行，自然要顧及中國人習慣同形象。正如你入得旺角戲院睇戲，就預咗有人講電話，夠膽起身嗌：「Shutup！」的確有勇氣，不過分分鐘散場做埋男主角，被打一身先走得。
比賽中叫球迷Shutup
上周六女單網球季軍戰，中國的李娜以0:6、5:7不敵俄羅斯嘅莎朗莉娃，祖國球迷大嗌「加油！」李娜好似聽唔明中文咁，表現毫無寸進，仲大鬧球迷：「Shutup！」，本判官嚇到喺沙發碌咗落地，幾驚觀眾席掟嘢落嚟，好彩在場球迷好似聽唔明英文啫！
李娜咁做好危險下，好傷國人自尊；而且中國人用英文鬧同胞，好易被當成「漢奸」！第二朝網民瞓醒後，查完字典即刻反擊：「講英文好巴閉咩？屎波就賴觀眾！垃圾！」其實，李娜賽後都解釋自己一時衝動，希望大陸網民息怒啦！
當局應提高觀眾水平
加埋今次，已經係李娜第3次鬧同胞觀眾製造噪音，上次多哈亞運「受害者」就包括隊友李婷。之後李娜亦試過形容印度球迷係「蝗蟲」；當時中國網管高層高瀋陽就批評李娜要顧及國家形象：「對手一樣受影響，點解只有妳忍唔到？」
其實，高官員應該盡力提高中國觀眾水平，而唔係去怪責李娜沉唔住氣。今次京奧嘅網球場觀眾都收到指引，譬如唔好亂嗌、咪畀細路走來走去等等。不過唔知係咪天氣太熱，呢類指引用晒來當扇用，看台照樣立立亂、嘈嘈閉。
京奧係宣傳文明中國嘅好時機，可惜內地政府顧得藍天、交通、防恐，已經無精力提高中國球迷嘅質素。希望李娜呢句「Shutup！」可以鬧醒班球迷同官員，提高欣賞體育運動應有嘅禮貌同修養，咁以後去到國外睇比賽，都唔會失禮人嘛！