名人第二代的私相簿時有曝光,馬詩慧現年16歲和13歲的女兒曼喜及麗嘉,早前就上載了自己的比堅尼照到互聯網。馬詩慧前晚出席曼喜芭蕾舞表演時,透露已吩咐女兒小心,勿再把同類照片公諸同好。
王仁曼芭蕾舞學校前晚在沙田舉行明日之星2008大滙演,演出「青蛙王子」等芭蕾舞精選,近千參演者有來自俄羅斯、美國和內地的學員舞者,包括內地著名舞蹈員、國家一級演員呂萌和焦洋,王敏德及馬詩慧(Janet)的長女王曼喜也有份參與,Janet和二女麗嘉則前來捧場。
麗嘉愛籃球
曼喜說:「第6年幫校長表演,跟咗校長十幾年,今年會係最後一年帶師妹出嚟,因為我16歲升中五,要專注考會考,不過都會keep住跳舞。」王敏德曾大讚兩個女兒跳舞有天份,前晚卻不見二女出場表演,曼喜說:「因為佢打籃球之後就少咗練舞,佢打波之後高咗,𠵱家高過我4.5cm。」曼喜貪靚,她透露也怕跳芭蕾舞腳粗,她說:「都有啲怕,不過用啱力就會好啲,同埋做拉筋。」
赴英國升學
早前曼喜和麗嘉兩姊妹將比堅尼照上載網上,Janet已下令禁止兩人再放泳衣相,Janet說:「唔係唔准影,我叫佢哋影咗相,留畀自己睇得喇,唔好公諸同好。」她謂兩女日漸長大,已為16歲女兒找暑期工,稍後會安排囡囡到英國升學,她說:「美國冇咁安全,同埋英國嚴格啲、緊啲,𠵱家要惡補個女考會考,因為佢成績一般。」
此外,葉劉淑儀帶同囡囡榮欣捧場,她透露女兒將升讀賓夕凡尼阿州大學,攻讀電子數碼媒體設計,正為女兒做入學準備。葉榮欣表示學了芭蕾舞7、8年,因海外升學而放棄,問她媽媽和王仁曼那個較惡?她說:「校長惡啲。」
採訪:JessicaNgan
攝影:EdwardChou