香港今屆奧運嘅獎牌希望唔多，來來去去都係單車嘅黃金寶同乒乓波孖寶李靜同高禮澤。阿寶已經同獎牌無緣，市民惟有將希望放喺孖寶身上。整日忙於為自己及黨友拉票嘅余大狀都好緊張，佢話噚日中午出門前見到孖寶領先緊，都有少少放心；點知再返屋企時，孖寶竟然又落後番，睇到非常肉緊。
呼籲選民留意選舉
雖然余大狀好多賽事都冇時間睇，但好彩有囡囡做賽後滙報，同佢講番好多賽事結果。呢期人人將注意力放喺奧運，選舉活動都要讓路，余大狀話日前電視台成夜晚11點至播出港島區選舉論壇，難怪連佢老公都呻話睇唔到喎。
余大狀提醒大家，奧運賽事四年一度好刺激，選舉又何嘗唔係四年一度咁罕有呢？所以選舉都同奧運一樣係不容錯過，叫選民睇奧運之餘，記住留意埋選舉。
身為余大狀對手嘅楊森噚日就舉行造勢大會，一班黨友幫佢整咗啲貼住「楊森連任」字樣嘅氫氣球放上天，點知氣球上升時有阻滯，一度升唔起，場面尷尬，最後要由一眾港島區區議員力托下先升上天，唔通寓意呢班助選團要更賣力先有奇迹？