奧運入面有個項目叫男子25米手槍速射，速即係快，男人一聽到個快字，唔好嘅就會諗埋一邊。呢個項目嘅金牌最後由烏克蘭選手奪得，中國嘅張鵬輝（小圖）就因為太早掹槍射埋，做咗「快槍手」，結果咪搞到被取消資格，冇得為中國拎多面獎牌囉！
出槍太快被判出局
我京奧判官就首先想介紹一下張鵬輝呢個運動員。張鵬輝其實一直係中國隊入面嘅射擊名將嚟㗎，自從喺05年開始已經係男子25米手槍速射嘅世錦賽冠軍，跟住仲連續拎咗3屆咁多㖭，你都咪話唔勁，佢仲被譽為中國射擊隊其中一個爭金熱門。
不過唔知係咪張鵬輝見到近期啲隊友表現咁好，搞到自己壓力好大，喺呢個速射決賽忍唔住手「走火」，犯規之下做咗「快槍手」。其實張鵬輝係因為舉槍太快而俾人取消資格；而根據國際射擊聯會第8.6.1.4條規則就寫明，3次違反出槍太快呢個規則嘅選手就會被foul出局，大家都可以想像一下張鵬輝猛咁「走火」嘅尷尬情況。
唔只鬥掹槍掹得快
做「快槍手」都未必唔好，好似以前睇過奇連伊士活某啲「鬼佬粵語殘片」，都有西部牛仔嘅題材，邊個掹槍掹得快射低敵人就贏，最後會成為英雄人物㖭。唔知係咪張鵬輝都睇得西部牛仔太多，諗住做吓中國嘅「快槍手」出吓風頭，𠵱家搞到連一塊獎牌都冇埋，呢個「快槍手」真係失禮囉。
到咗𠵱家喺中國人嘅社會，「快槍手」呢個term對某啲男人嚟講係大忌，我京奧判官衷心希望張鵬輝做咗「快槍手」後，返到屋企唔好再諗，嗰種衝動表現更加唔好帶返屋企啦！