首爾蠶室前日好熱鬧，主競技場嗰邊有闊別韓國舞台9個月嘅BoA，率領事務所一眾師弟妹，包括SuperJunior（SJ）、東方神起、少女時代、SHINee等演出晒冷演唱會「SMTOWNLIVE'08」，而距離冇幾遠嘅棒球場就有「音樂教父」徐太志搞嘅搖滾音樂節「ETPFEST2008」。
當日雖然落雨，但45,000名歌迷見到久違了嘅BoA都好興奮，BoA仲講笑話自己有個外號叫「雨女」，上台開騷總會招風雨。
SJ神童扮李孝利
一向搞鬼嘅SJ肥仔成員神童，突然戴上長假髮扮女歌手李孝利唱歌，仲風騷送飛吻，場面爆笑。
東方神起嘅Hero露點大跳勁舞，掀起另一高潮。少女時代亦走出6月時被其他歌手嘅fans杯葛嘅陰霾，演出時再無被fans以沉默杯葛，令長達5個半鐘嘅演出十分成功。徐太志嗰邊就冇咁好彩，放在台前嘅煙花懷疑因天雨關係而爆炸，令一名工作人員受傷送院。