連續睇咗七晚奧運馬術賽，興趣愈益濃厚。沙田比賽場地（以下簡稱沙田）晚晚人頭湧湧，公眾席有爆棚之盛，以香港對馬術咁少認識嘅地方，晚晚有一萬人以上進場，可說十分難得，所以左丁山好唔明白，點解總係有啲「唱淡派」要大罵奧運馬術賽，居然講到：「勞民傷財搞了這樣的一場奧馬，算成功還是失敗，不知提醒曾特首親自掛帥的習副主席將會如何評價？」呢位先生大概好想曾特首下台，想還想吖，有佢嘅自由，但如果呢位專欄作家以為奧運馬術會傷害到曾特首之「習副主席評價」，咁就錯晒咯，仲有三幾日（以寫稿日開始計）馬術賽就會結束，直到目前為止，馬術賽都唔知幾順利，觀眾多氣氛好，居港外國人持國旗吶喊，為自己國家捧場，尤以澳洲人、荷蘭人為甚，充份顯示出香港係一個國際城市，順帶吸引埋外國皇室貴冑來港觀賞，佢哋因而對本港酒店，餐飲及零售業得到一個好好印象，勝過旅發局拚命買入外地電視廣告時間嚟宣傳。
批評奧運人士請親自到沙田親身體驗吓，唔好閉門造車，噏得出就噏，一味盲目話「馬術觀眾瞌眼瞓，馬匹不停轉圈，悶到抽筋」。《壹週刊》又係嘅，上星期第六十頁刊出一張圖片，說明馬術賽早上沙田場內入座寥寥可數。其實張相片已經可以話畀讀者聽，當時正值日出之前，觀眾還未大量入場，席上觀眾梗係少之又少啦。如果《壹週刊》登出一張早上八點嘅照片，就知道席上滿是香港市民。壹仔編輯故意選一張咁嘅相片，唔知想傳遞乜嘢信息。
壹仔楊社長嘅老友中貿林喺上星期二與一班校友一齊進場，包括罐王F、會計師L、保險老闆C、校長A等等，畀左丁山在人羣中睇到，中貿林大概可以向楊社長作第一手報告場內究竟有幾多人，勝於編輯坐在將軍澳冷氣辦公室內猜想。中貿林帶埋一枝大炮望遠鏡入場，遠遠望到左丁山與靚女C交頭接耳，立即打電話問：「你隔籬係邊個？」騎騎，好彩靚女C係半個馬術專家，教緊左丁山如何欣賞盛裝舞步賽，如果唔係，說不定會畀在場記者攝入鏡頭，放在娛樂版嚇親左丁山老婆也。