20年前紅白機當道，橫向動作Game百花盛放，尤其出名難玩嘅《惡魔城》，嗰條發發聲嘅長鞭，真係迷倒唔少機仔。同屬向《惡魔城》致敬作品之一嘅《BionicCommando》（坊間稱希特拉復活），超靚3D版等極都未出到，反而隊隻2D重製版出嚟，同舊作一樣冇跳掣，過關全靠左手條生化鉤繩，由頭盪到落尾，仲型過李寧吊威也傳聖火。
記者：徐影龍
萬變不離「遊盪」
當年實在太多出色動作Game喇，《BionicCommando》（下簡BC）喺《孖寶兄弟》、《惡魔城》下未算太突出，不過獨特操作同角色設定，始終有唔少發揮空間。Capcom晨早預報續作以全3D登場，咁多機迷抱怨佢遲遲未推出，皆因公佈嘅畫面的確令人好期待；場景超大兼複雜，由廢墟城市到Rambo叢林，統統都有位俾你勾住盪嚟盪去，將三維概念發揮得淋漓盡致。3D版仲將射擊系統改成鬼仔最愛嘅FPS類，即係盪完一輪仲要走位瞄準，尤其打巨型機械首領，必須邊Fling邊Shoot，再從敵人弱點着手。「遊盪」技巧已經有排練，仲要搞到咁複雜，恐怕我會玩到雞手鴨腳。
支援網戰大亂鬥
3D版未有着落，2D重製版《BC：Rearmed》就剛喺PS3同XB360熱辣推出，不過歸類為小遊戲下載類型；PSN（$78）同Live（800點）即日有得Download，兩者容量接近，約300MB好快下載完。呢款將20年前舊作重製版，簡簡單單橫向捲軸型，令年過三十嘅機迷湧起澎湃回憶！同樣係不設跳掣，得三個方向射個勾出嚟，乜位勾得住一眼睇晒。動作Game無得跳都幾麻煩，一個油桶擋住，居然要盪十幾下先兜到過對面，起初真係好唔慣，不過練熟咗「遊盪」技巧後，其實可以好靈活，而且2D版舞台較易掌握，上上落落偷襲敵人如履平地，一路玩一路換武器，得閒嚟招「盪起回槍」，都幾有滿足感㗎！
重製版另一賣點係多人齊玩，除咗二人合作過關外，仲支援大亂鬥式Online對戰，小小一個戰場，四人齊齊Fling個不亦樂乎，鬥搶道具同武器，肯定相當之熱鬧有氣氛。幾十蚊幾個人Fun，幾抵丫！
冷笑話硬銷完全版
遊戲系列出名玩爛Gag，試玩版途中遇到總部聯絡，出現上司訓話：
「做乜唔玩更好嘅完全版？蠢才！」
「咪緊張，我只係試吓啫。」
「做男人必須好似我咁積極，速速買！」
「好HardSell……」
敷衍完上司，過隔籬解埋3D謎題，點知聽到敵方對話：
「報告！發現有人打機唔畀錢，Sir！」
「唔使理佢，佢只係打緊試玩版，到完全版我哋自然會好好整治佢！」
「咁……我會唔會都喺完全版出現，Sir？」
「梗係會啦，低B仔！」
衝前一輪去到首關Boss度，竟然話Demo導致系統Fail，無得打大佬，吹脹！
水木一郎熱血撐場
Capcom都算抵死喇，搵嚟熱血三十年嘅水木一郎唱宣傳歌，呢位三一鐵甲幪面超力歌手，幾十歲人仲鬼咁好中氣，係咁「Go！Go！Go！」，搞到同樣幾十歲嘅我，都不自覺跟住唱。日本官網MV只得水木把聲，想睇真人反而要去美國個網，奇怪。
《BionicCommando：Rearmed》
遊戲類型：2D橫向動作
對應機種：PS3、XB360
遊玩人數：1-2人 （支援網上4人）
售價： PSN（$78）/XBLive（800點）
開發商：Capcom、Grin
官網： http://www.capcom.co.jp/bc/