中國農曆鬼節喺夏天，原來日本人都興喺炎夏夜晚講鬼古，裕美仲試過親身經歷靈異事件㖭。話說裕美細個喺日本生活，幾多歲佢已經記唔清楚，亦唔記得嗰晚因乜事深夜時分同媽咪搭的士返屋企。搭過日本的士或者睇過日劇都知，日本差唔多部部的士都有導航系統，一撻着真係煩到嘔：「三百米後轉左，一百米後轉左，轉左轉左轉左……」小裕美人仔細細好好奇，一上車見司機粒聲都無，就想望吓司機個樣，不過日本的士司機興戴帽，又無燈，淨係見到帽邊遮住嘅黑色陰影，連佢眼耳口鼻都見唔到。
架車行行行，耳邊不斷傳嚟電子導航嘅「轉左轉左」機械聲，聽聽吓，導航忽然傳出：「落嚟……落嚟……落下面……」小裕美驚到攬實瞓着咗嘅媽咪，瞇埋眼偷睇出面情況，發覺自己去到一個好似海邊嘅地方，電子導航繼續傳出：「你哋落嚟啦……」呢個時候，的士司機仲擰轉頭，真係擰轉頭！個身唔郁但個頭180度擰過嚟，望住兩母女笑。
「哇哇哇！」小裕美喊咗出嚟，呢個時候媽咪醒咗：「裕美！乜事呀？落車喇。」原來係發夢，落咗車，小裕美再望一望架的士，明明應該係望見車尾，點解––又見到個司機正面望住佢邊笑邊揮手嘅？
文：嘴嚼爺