前日話華天（AlexHua）係明日之星，點知星星好快就跌落風塵，華天喺八月十一日之越野障礙賽墮馬出局，佢自認判斷馬匹步伐出錯誤，與人無尤。華天既然肯坦白認錯，仍有前途，返英國繼續練習可也，二○一二年在倫敦奧運出賽，有主場之利㖭！華天母親係英國人SarahNoble，爸爸係中國人，有一位富有中國人地產商（JiangFengcan）贊助佢習騎費用及買馬，買咗一共六匹畀華天選騎，總共用咗四百萬美元，呢位贊助人江（譯音）先生認真慷慨。中國人有錢起來，唔講得笑。華天揀咗一匹灰馬Chico來港出賽，以墮馬告終，不無遺憾。加州州立大學（CSU）有一間分校，就叫做Chico，華天隻馬點解叫做Chico，有待研究。呢位江先生對《華爾街日報》講，外國人只知中國精於乒乓、體操、跳水，其他乜都唔識，華天就可以話畀世人聽，強盛的中國，冇嘢可以難倒。奧運奧運，中國人站起來了！另外一位奧運選手參加場地障礙賽嘅李振強係東莞農民，唔知識唔識講英文，講東莞鄉下話，攞贊助就多了一層障礙咯。
中國仲有一位新疆姑娘劉麗娜參加盛裝舞步賽個人賽，劉麗娜今年二十九歲，十四歲加入馬術隊，自二○○二年起到丹麥德國受訓，學懂英語德語。
香港方面，李明華（JenniferLee）因愛駒Mr.Burns有傷退出，選手還有三位，就係一九八六年亞運馬術團體賽隊員鄭啓明之子鄭文傑、林子心與林立信。鄭文傑四歲時受父母影響，騎上馬背，現在更青出於藍，參加奧運。林子心小姐生於溫哥華，七歲習騎，為咗參加奧運，放棄加籍。第三位係林立信，出生於奧地利，在美國受教育，識英、德、意三國語言，亦通拉丁文，除騎術外，亦好高爾夫、攀山、籃球、游泳，堪稱文武雙全，但一切條件雖好，到了沙田奧運場地，才見真章。香港觀眾，在場地障礙賽及盛裝舞步賽，請為中國及香港選手打氣。