羅霖（Candy）婚後連生兩子，兩年多前冧莊又是仔仔。奉特首籲生了三個。但不是女孩才有趁墟效應，三個仔仔三種性格，民望下挫的特首叫人生無教人教，Candy管得嚴常被老公投訴。但嚴厲管教背後非為望子成龍：「唔奢望佢哋做偉人，但起碼幫到人。」又一個荷媽！
記者：林佩婷
攝影：陳盛臣
三個夠晒數
大仔Nathan今年11歲，二仔Jordan9歲，但細仔Jonathan今年卻只有兩歲，年紀相差頗大。Candy說是意外：「生咗兩個仔仔，點知後來意外再懷孕。最初都希望係個女，但係仔都一樣開心，因為都是神所賜予。」
隔了約10年才有第三胎，Candy的育兒心得始終如一。由胎教開始便喜歡順其自然：「因為做胎教即代表對BB有期望，最終會為自己帶嚟壓力，只要自己保持心情開朗便成。」
駁仔仔嘴
從胎教到成長，貫徹自然因材施教。「我本身係24小時全職媽咪，好了解佢哋。Nathan性格穩定成熟。Jordan外強內軟有創意無耐性，成日發白日夢做發明家、科學家，所以我只要求佢科目及格，其餘由佢自由發揮。買練習簿畀佢唔係為成績，而係想訓練佢定力。細仔Jonathan雖只兩歲，但最有主見，連我着咩衫都要決定。所以我有時要同佢反駁吓，等佢知唔係事事都要順佢意。」
三兄弟齊冲凉
媽咪因材教仔也是理所當然，但兄弟間才不會就住就住。妒忌心理加上男仔好競爭，又是一番學問。「陀第二胎時，哥哥先是好奇，要我成日打開肚畀佢望，到我由醫院返屋企，就特登買份禮物，話係細佬送畀哥哥。到前兩年三仔出世，我就叫兩個哥哥幫手改英文名，細仔Jonathan個名就係Nathan同Jordan嘅混合體。但當Auntie都圍住Jonathan時，兩個哥哥都有呷醋，我就安排佢哋平日一齊冲凉聯絡感情。細佬𠵱家成日跟住哥哥周圍走㖭。」
奧運精神教仔法
臨床心理學家MayChan指出，想教好仔女，最緊要是家長先調整自己心理：「香港家長有事事要第一的心態，即使他們沒在小孩面前表現出來，仔女自己也感受到。其實家長先要諗清楚想培養小孩成為咩人，亦要懂得放手讓孩子自己發揮。利用時事入手是很好的培養法，好似呢排可教奧運精神，咁多運動員唔會個個第一，最重要係破自己紀錄。」May還鼓勵用音樂輔導小孩，趁奧運寫了首歌《拼出更強世紀》，利用輕快節奏表達不怕輸精神，更特設網頁讓小朋友親自發掘快樂的方法。（ http://www.happinessacademy.net）
Lego運動迷城
潮媽Candy亦趁奧運增進親子關係，心知Jordan最愛Lego，故特地和他到商場的「運動『迷』城展覽」。場內由超過30萬粒Lego積木及3,500個Lego人仔造成，包括雅典神殿區、運動選手村及賽場運動城市，還有迷你馬術場館，消費滿$500或以上可於運動迷城照相館內拍攝有電腦效果的照片，Candy為仔仔乜都制，騎呢Pose擺了一個又一個，拍了一幅又一幅如置身迷你場館內跟Lego運動員合照的相片，親子之道，莫過如此。
親子萬里路
Candy認為讀萬卷書不如行萬里路，待到仔仔約14歲左右，更打算和他們到內地扶貧，希望幫到更多人。
運動「迷」城展覽
日期：即日至8月31日（12:00nn-10:00pm）
地點：旺角新世紀廣場一樓星際廳
查詢：23970790