日產Qashqai七月初報到，外形圓潤好玩，連甩尾王James話佢似縮水Cayenne，Q仔武功高強，集SUV同Hatchback特色於一身，車身高，操控靈敏又實用，今次過江試揸Q仔，捐窿捐罅吃喝玩樂，大大個天幕方便睇景兼影相，開心！
記者、攝影：梁美甜
Qashqai堪稱新一代城市玩樂車，廿零萬貨仔，有Hatchback好玩味道兼具SUV實用性，車身高，行走扽到死嘅凹凸路面、忽左忽右轉到暈嘅彎路甚至超級大水氹都非常穩定。上次同Q仔見面只得短短幾粒鐘，未試真架車特性，今勻可以過大海跑澳門街，仲唔乘機揸番夠本？Qashqai好掂，幾個人幾個大背囊隨手掟上車，都仲有大把空位任坐任碌，未使用到個尾廂，車櫳大先加分。
處處見藍天
澳門大小馬路都出晒名人多車多，人車爭路，路面多彎勁窄，部車行慢啲啫，唔係俾行人霸咗就俾其他車跑出切線，好考駕駛技術。澳門建築物密密麻麻，有濃厚葡萄牙殖民地色彩，好彩唔係起得好高，憑着Q仔特大天幕，行到邊都見到藍天，大把靚相影。
近年澳門大肆發展旅遊業，多間娛樂場所或酒店都係取景熱點，我由碼頭出發，圍繞澳門島跑一轉，特色靚人靚景即時睇晒。坐喺闊大車廂，頭唔使左擰右擰，人唔使左望右望，透過天幕，漁人碼頭、觀音像、大三巴、永利、金沙、MGM等一眼望晒，呢個天幕真係好掂，攤喺車廂點睇都得，疏爽到暈。
遊勻熱門景點
行澳氹大橋往氹仔出發，上橋可以望到珠江口同沿岸景色，去到氹仔，點都要去威尼斯人酒店打個Round，唔係趕住賭兩手，而係去取景，話晒呢間酒店花咗唔知幾多個零裝修，唔停低架車影番張相，對唔住自己。影夠相，同酒店Saybye，沿路向路環狂奔，話就話狂奔，查實平均車速頂盡每小時60公里，無計，澳門大多數馬路都係行咁上下最高時速，上高速公路先可以踩大啖啲油。
同行代理朋友見我好似有晒目的地咁，好奇問：「老實，去邊度先？」我答：「搵嘢食。」「是但搵間茶餐廳啪個麵咪得囉。」「唔係嘛，去得路環，梗係食正宗熱辣葡撻喇。」食飽，沿友誼大橋返澳門島，去議事亭前地停一停，再掃多輪嘢食先捨得走人。總結，澳門無乜機會行車太快，更適合Qashqai遊走窄路，事關呢架車軚輕靈巧，指向性高，車身高視野廣，行車靈巧如靈蛇，爽快利落，唯一要挑剔係懸掛偏硬，坐後排總覺彈彈吓，八月十五有啲受罪。
NissanQashqai規格
引擎：1,997cc，直四
馬力：137ps/5,200rpm
扭力：20.4kgm/4,400rpm
驅動：前置引擎、前輪驅動
傳動：CVT半自動波6前速XTRONIC
車價：$236,800
查詢：合誠汽車（22621088）
