退休高官梁展文為勢所迫，同新世界和平分手，隨即發出聲明，前一句驚訝官員疏忽，後一句大讚俞宗怡有承擔，留喺政府係市民之福，有人認為梁展文講風凉話，引詩自況「雲散月明誰點綴，天容海色自澄清」，八方就覺得佢係跌落地揦番拃沙。
呢兩句詩出自宋代文豪蘇東坡《六月二十日夜渡海》，「參橫斗轉欲三更，苦雨終風也解晴。雲散月明誰點綴，天容海色本澄清。空餘魯叟乘桴意，粗識軒轅奏樂聲。九死南荒吾不恨，茲游奇絕冠平生。」梁展文只係引用首詩第三、四句，唔知係佢有心定無意，「天容海色自澄清」原文應為「本澄清」。
呢首詩係蘇東坡晚年作品，當時佢被貶海南後獲赦返歸，坐船時遇到風雨，「苦雨終風」係指受人迫害，風雨過後「雲散月明」，蘇東坡想話自己做事一向光明正大，唔怕政治迫害，梁展文咁樣自比蘇東坡，怕唔怕斷章取義教壞細路㗎？
自比蘇東坡唔怕羞
引經據典要原汁原味，梁展文吟咗兩句，無上文下理，八方恐防大家唔知佢心意，嘗試解讀佢心底話。首詩後面四句，大意係話蘇東坡自感有才幹，但冇機會一展所長，更被貶到無雷公咁遠，好彩佢EQ高睇得開，遭到迫害都冇後悔咁話。梁展文唔係港大「天子門生」出身，係所謂「非一般AO」，喺官場難免覺得同人格格不入，但佢始終未試過被貶，甚至做到常秘，點睇都好彩過蘇東坡多多聲喎。
梁展文有冇曲解蘇詩，大家可以自行判斷，如果佢想自比蘇東坡，睇落就似乎有啲監硬嚟。據講蘇東坡自小聰敏好學，21歲就考取進士，梁展文唔知有冇咁天才？而蘇東坡官運雖然唔係一帆風順，但被讚為官清正，為民興利除弊，政績頗多，口碑甚佳，唔少事迹流傳至今，相信好多人耳熟能詳。
至於梁展文，佢嘅「政績」，有令地產商大賺特賺嘅環保露台，有嘉亨灣少收地價逾億元風波，紅灣半島唔使多講係代表作，咁樣做官，蘇東坡點同佢比呀？蘇東坡半生坎坷，寫完《六月二十日夜渡海》後無耐就病逝，呢首詩，有人話係最後留下作品之一。
mailto:[email protected]