「運動係我嘅生命」，79年港姐冠軍兼最上鏡小姐鄭文雅，自小對運動充滿天份，91年跟商人虞哲輝結婚後淡出娛圈，二人同習高爾夫球，兩年後她在香港高球壇嶄露頭角，代表香港隊7年、更成為首位華人女教練，同時也開始她的健康人生，注重生活習慣、均衡飲食跟天天運動，最fit港姐實至名歸。 撰文：羅慧敏
現年48歲的79年港姐冠軍鄭文雅，離開演藝圈多年，至今依然保持身心健康，原來有規律與健康的生活習慣是她的養生之道，鄭文雅日前說：「生活習慣、保持健康生活方式係最緊要，啲人話一個月減肥，我唔贊成，我覺得要維持健康生活習慣，唔係尋求短暫嘅解決。」
「運動係我嘅生命」
鄭文雅每天一定會做運動，打高爾夫球不只是娛樂，更是她的職業、目標，鄭文雅說：「除咗生活習慣，其實運動就係我嘅生命，golf更加唔使講，當然身邊partner好緊要，大家一齊行呢個生活方式會更加好，我同老公（虞哲輝）都互相鼓勵去一齊行呢個生活方式，起初我哋想搵一樣運動一齊做，等大家唔使嗌交。初初打網球兩個程度唔同，好難打，所以就揀咗高爾夫球，其他有羽毛球、乒乓波同做gym，因為我屋企clubhouse都有，好方便，方便好緊要，有時間就會去做。」
鄭文雅每天都會跟着太陽的作息時間生活，規律的生活習慣日日如是，她說：「每朝早唔會遲過7點半起身，一起身會做熱身運動，下午會做出汗嘅，每日都要有運動，晚上會10點半瞓。每星期我教四日波，但最緊要一定係留返兩日畀自己，同老公打波，有個伴，一齊玩、一齊食嘢，好開心。」
四部電視睇奧運
對於最fit港姐的稱號，鄭文雅謙虛表示不敢當：「唔好咁講，fit唔係外表，其實最唔鍾意𠵱家啲人睇瘦嘅標準，唔鍾意啲模特兒瘦到得棚骨，減肥減到咁瘦未必有抵抗力，咁唔健康。」
鄭文雅是78年香港跳高紀錄保持者，身為運動員，她對正在北京舉行的奧運會充滿熱情，她說：「我好鍾意跨欄，好欣賞劉翔做到，奧運我一定會睇，我唔會去北京，因為我鍾意睇嘅太多，基本上全部鍾意睇，去到唔知睇邊樣，所以寧願喺屋企將四部電視放晒喺度睇，每個運動員都會有最高表現，人哋成世workfor嗰一秒鐘，我好欣賞運動員嘅心態同努力，我希望劉翔會贏，我永遠支持中國。」
攝影：陳慧安
場地提供：IslandGolfClub
鮮果早餐回歸自然
為保持健康的飲食習慣，鄭文雅吃東西總是少鹽少油。每天鄭文雅都以超過五種生果做早餐，為吸取不同的維他命，她說：「朝早本來似一隻馬騮就咁食條香蕉，𠵱家已經變咗大猩猩，7點起身後，最少食5至7種生果，一定係季節性生果，跟住會食一杯自己整嘅乳酪。」
湯水補身
到早上9時，她每隔一小時會吃一片花生醬麵包，中午吃一碗魚湯米線，用新鮮魚湯、番茄、蝦米等烹調，再加菜，便是她的午餐。
晚餐通常以家常菜為主，三餸一湯，包括蔬菜和蒸魚，每日的湯水最重要，冬天湯水着重補身如人參雞湯，夏天則清熱為主。每天鄭文雅會喝大量開水，她笑說：「一日飲水要飲1500毫升，飲到有水贊助。」
話你知：78年破跳高紀錄
少女時候鄭文雅已是運動健將，充滿運動細胞，更是78年至80年香港跳高紀錄保持者，她說：「中學同學形容我，踏上單車已經識踩，又成日拎住條橡筋繩，我基本上乜嘢波都識，嗰陣時好興有關運動嘅日本劇集，打排球戲一出就風靡所有人，跟住《綠水英雌》游水好興，就走去游水，嗰時冇選擇，大家只係會睇電視，返到學校成為話題，就跟住做，好彩嗰時成長過程嘅劇集好健康，自始我就一直未停過做運動。」
心靈雞湯：睇養生書益好友
鄭文雅閒時愛買養生書籍閱讀，最近她正在看一本名為《黃帝內經認識中國式養生》的養生書籍，令她獲益良多。書本講述一個人的生理狀態，並細述人體內臟每日應作息的時間，鄭文雅更將這些知識記錄在筆記簿，圖文並茂，細心講解給身邊有需要的人聽。
高球偶像：欣賞活士破色戒
在高爾夫球場上幾經努力，鄭文雅終於獲得傑出成就，她在golf界也有一位偶像，她說：「我鍾意活士（TigerWoods），佢嘅出現影響整個世界高爾夫球面貌，佢係黑人，因為美國仲有啲球場係黑人唔可以進入，以前香港高爾夫球會華人與狗不得進入。」
鄭文雅續說：「美國係有種族歧視，活士嘅出現改變整個運動白人為主嘅一樣嘢，影響好多有色人種去提倡呢個運動。我有見過佢，我去泰國睇過佢比賽，佢嘅mind好strong，殺氣好大。」