長城汽車（2333）短短三個月，插咗60%過外，插到變晒形，但講質地，長汽唔曳，再跌博番轉。長汽上年底止嘅手頭現金33億銀人仔，折合近38億港銀，又無負債，等於長汽每股淨現金值3.45元，長汽現價都係講緊3.77元。
再講，長汽最新NAV6.4元，現價折讓41%，近晒士級數嘅汽車股，包括駿威（203）及東風（489），現價無折讓不特止，P/B兼挨近1.5倍水位，長汽折讓夠吸引。長汽1年累積跌咗75%，往績PE落到得番3.6倍。呢期有歐資行出報告，短線睇淡長汽，兼調低未來年度純利預測，但以報告08、09年度每股純利預測，都上到1元及0.9元，預期PE都係講緊3.77倍及4.2倍。呢個PE水位，點秤都抵。長汽短線再調整，吼實每股淨現金值3.45元兜轉，博20%升幅，到4.14元，長汽P/B都未有耐上1倍水位。
富豪產業避風力強
富豪產業（1881）重秤前NAV講緊3.5元，現價（1.58元）折讓上到54%，已經有折讓墊底。又好保守計數，富豪REIT08年度嘅派息，只係keep到07年度水位，每基金單位派發0.153元，息率都講緊貼近10厘。市場裏邊嘅酒店股，有富豪REIT咁嘅NAV折讓，都未必有佢咁高息。港股呢期橫風橫雨，高息企業避風力特強。嚟緊25號，富豪REIT會公佈半年度業績，買定等派息，兼博股價抽番上兩蚊，亦係未有耐到NAV水位。