傅穎（Theresa）昨日和日籍設計師安宗裕記出席時裝活動，安宗裕記早前已在個人網頁放上Theresa靚相，擺明冧爆對方，他甫見Theresa便如螞蟻摟蜜糖，熱情地攬實她合照，雙手懷疑觸到女方胸部，令Theresa面紅耳熱。
傅穎昨日到尖沙嘴新港中心為BeamsT與PSP和設計師安宗裕記crossover的展覽任嘉賓，活動開始前，安宗已邀請Theresa穿自己設計的Tee加短裙面貼面玩自拍，其後他又繼續為Theresa拍照，狀甚稔熟。
坦言感到尷尬
兩人應邀合照時，初時二人相隔太遠，經記者要求下並肩而站，此時安宗熱情地以雙手大力擁抱Theresa，更懷疑觸及女方胸部，但Theresa只懂儍笑面對鏡頭，影相完畢Theresa即時轉身，與玻璃櫥窗外的fans打招呼，似乎感到十分尷尬。
被熊抱致面紅紅的Theresa，坦言有點尷尬，但強調未有蝕底，她說：「冇掂到，我自己識避㗎嘛。」問到可抗拒異地戀時，她說：「溝通好緊要囉，我同佢都係講英文，佢又會成日send啲衫畀我着，我影相放上blog佢都會轉載。」其實Theresa已知對方性格熱情，早前她到日本拍寫真時透過攝影師介紹認識安宗，她說：「第一次見面，佢對大家已經好熱情，可能係因為佢喺LA（洛杉磯）讀書，所以性格有啲鬼仔啦。」
網誌早示好感
安宗在本月3日的網誌內以「her"smiling"」為題，上載了Theresa的大碟封面照。他在文中直言期望本月到香港時能與Theresa再見面。相隔數日，他又在網誌內上載了Theresa的相片，顯然對她甚有好感。
安宗裕記Blog： http://blog.maskthemask.com/
採訪：藍文浩 攝影：陳慧安
人物誌：日潮服揸弗人
身為日本服裝品牌TheMask的設計師安宗裕記（HirokiYasumune）今年35歲，曾於日牌Neighborhood及Undercover擔任品牌經理。由他主理的品牌TheMask，以擅長用人的容貌創作而聞名，近日更獲邀與潮牌BeamsT及PlayStation合作，推出限量T恤、PSP套及手機繩等出售。