奧運大過天，立法會選舉都冇人關心，港台噚日舉行選舉論壇，一班港島區立法會候選人唇槍舌劍，不過佢哋狂噴口水唔知有冇拉票效果，因為電視台方面優先播放奧運賽事，而選舉論壇就要到夜晚10點半先播出，如果賽事加時就順延。
電視台播廣告、劇集唔播奧運都有觀眾投訴，如果腰斬播出賽事而播選舉論壇，八方相信投訴更多。選舉論壇台上嘈嘈閉，台後風光反而仲精采。八方噚日深入後台，見到退出民主黨參選嘅黎志強，阿牛擺明玩佢，叫佢快啲同民記蔡菜子握手，又叫蔡菜子多謝黎志強，因為黎志強分薄民主黨票源，變相益咗蔡菜子。
葉劉就同論壇主持人投訴冇水飲，主持人話愛莫能助，「你做官咁耐，都知道我哋港台預算好緊張㗎啦！」葉劉舊年補選失敗歸咎於民建聯，啖氣似乎未落，噚日批評曾鈺成絕不留手，民記助選團聽到葉劉咁講表現不忿，雙方關係好極有限。