男士牛脾氣唔係man嘅表現，可能係有病！好多人都知踏入更年期嘅女士，因為荷爾蒙分泌驟降，搞到脾氣暴躁，原來男人都一樣，會受荷爾蒙改變搞到成日發火，但病發時間唔喺更年期，而係喺青少年期同踏入中年兩段時間，因雄性荷爾蒙分泌明顯唔同，而患上雄性易怒綜合症（IrritableMaleSyndrome）。
兩階段最易發病
雄性易怒綜合症，又或者叫躁男症候群，最早係由蘇格蘭嘅研究人員發現，佢哋發現公羊如果雄性荷爾蒙睾丸素水平急劇下降，就會好易狂躁同憤怒。美國精神科專家戴蒙三年前，搵咗幾十個唔同年紀嘅男士參加研究，睇吓佢哋嘅雄性荷爾蒙水平同情緒反應嘅關係。
結果有四成人經常都好急躁，又容易發脾氣，佢哋嘅睾丸素水平都係偏低，15至28歲或者40至55歲都係病發嘅高危期，如果加埋失戀、離婚、工作壓力等等嘅外在因素，就更加容易出事。
男士易發火唔單止令身邊嘅人神憎鬼厭，發脾氣之後通常都會變得情緒低落，情緒大上大落，甚至搞到有情緒病，所以千祈唔好睇小雄性易怒綜合症嘅影響，我醫神奉勸各位躁男，千祈唔好諱疾忌醫，早啲去睇醫生。
外國有啲研究仲話，將雄性荷爾蒙調節到正常水平，會無咁容易發火，平日食多啲麵包同飯等高碳水化合物，加埋運動，可保持精力旺盛，都可以預防雄性荷爾蒙急降。
blog主：醫神