副局長譚志源以前係政務官，老董年代係前財爺阿松左右手，佢噚日出席港台活動時指老董人雖走，茶未凉，一班舊政務官都有同老董保持聯絡，每年都會向佢拜年。
邱副局長請食餅
譚志源又話大學時讀工程，因為當時潮流興，其實冇深思有冇興趣，畢業後加入政府，亦冇諗過會一早十幾廿年，𠵱家轉做政治任命副局長，真係一個挑戰，但世事難料，好似佢前老細阿松咁，邊個想到會黯然下台？
譚志源出身公務員，做新職位應該最易適應，反觀「空降」嘅副局長同公務員磨合就要花多啲時間，啱啱埋位嘅運輸及房屋局副局長邱誠武，聽聞返工第一日，就向同僚發出長篇大論電郵。
有得閒兼睇晒成篇email嘅老友話畀八方聽，邱副凳都未坐暖就狂擦同事鞋，盛讚大家安排奧運馬術交通妥當，而佢未正式返工前，已私下拜會局長同部份資深官員，更請食西餅，禮多人不怪，相信佢同公務員合作順利，有人話美中不足係並非人人有得食餅啫。