滕麗名同郭政鴻呢段撲朔迷離嘅緋聞認真難捉摸，雖然佢哋成日俾人影到出雙入對，不過兩個人點都唔肯認拍拖。但噚日呢pair緋聞情侶，就一反常態，佢哋着襯到絕嘅黑色情侶裝，同鄭少秋、周麗淇及鄧健泓，去咗喺電視城舉行嘅《桌球天王》拜神儀式，佢哋上次試造型唔肯影合照，但今次好「自動波」，滕滕影緊單人相嗰陣，郭政鴻自動自覺走埋去，仲主動環抱滕滕影相，之後仲好大方攬實滕滕嘅纖腰合照，狀甚溫馨。
事後問滕滕係咪公開戀情，佢就大發嬌嗔話：「癡線㗎！冇拍拖點公開呀？你哋好似跳咗程序喎！」
全屋裝防盜
之後滕滕轉話題話上兩個禮拜屋企俾人撬門，初初以為係農曆七月撞鬼，但係好彩佢大聲叫，而且道門又鎖咗，所以個賊好快走咗。有記者笑話應該搵個男人返屋企住，滕滕就笑笑口話佢都冇男友，而且爹哋媽咪又會同佢住，又整咗全屋防盜，所以唔擔心。至於郭政鴻有冇慰問？滕滕甜絲絲話好多朋友都有慰問。
秋官約欣宜
同劇的秋官亦加入玩緋聞男女行列，他笑笑口話：「冇着黑色衫，都唔係好啱做訪問喎！」佢仲話部劇會拍到10月，可能有機會喺電視城撞到欣宜，所以佢會叫定助手約欣宜食飯，秋官仲話欣宜好獨立，所以唔使擔心同畀意見。此外，噚日係鄭嘉穎39歲生日，緋聞女友周麗淇俾人追問會點同嘉穎慶祝，Niki笑笑口猛話：「得啦！得啦！大家都好忙，私人嘢唔想講。」