星俠出席某上市公司飯局，人人關心港股究竟跌完未？講真，席間無人敢答個市幾時見底，即使有人發表高見，答案都係模棱兩可。據星俠耳聞，很多散戶估港股在20500點守得住，個人以為越多人咁諗，該水平跌穿的機會則越大。總之，在港股仍險守21000點水平之際，坊間現已進入全民皆「估」。
昨日搜股期間，發現在濠賭股浪潮時期炒得火熱的新濠（200），走勢認真今非昔比，今年表現可謂一瀉千里，但自澳博（880）上市陰影消除後，近期新濠股價由低位回升，昨日更逆市炒上6.7%，重上5.60元。
賭業前景不明
澳門特首剛發表過對澳門經濟前景睇法，表示不敢樂觀之餘，又話會檢討博彩業未來發展。
其實，若然大陸唔「放人」到澳門，當地賭業在「僧少粥多」情況下都幾難搞，政策要睇中央，澳門角色好被動；何厚鏵開到聲唔睇好澳門明年經濟，莫非佢探到風中央短期未必放寬限制大陸人到澳門玩？只有佢心中有數。行業前景不明朗，高增長又暫難再現，見勢追炒新濠似乎風險不少，如果有貨，伺機趁反彈減持。