早幾日小藍去高級視廳展逛，見到一個叫做「原木」嘅攤檔售賣黑檀木釘，佢係放喺音響器材如喇叭底部，啲Hi-Fi即刻變靚聲。啲釘都成百幾蚊一粒，但啲人搶住去買。我都知唔少音響發燒友會用金屬釘，唔知木釘都得，咪搵老闆Matthew問幾句，佢當時忙到唔得閒招呼小藍。
小藍噚日踩上門去旺角嘅原木舖頭問個究竟。Matthew話，金屬釘同木釘嘅目的都係一樣，係減低Hi-Fi播放嗰陣產生嘅諧震，以免影響音色。如果鍾意聽純音樂，應選用金屬釘，啲聲會清脆啲；鍾意聽人聲，就要揀木釘，人聲會厚啲，音場會闊啲。
Matthew又話，唔係乜嘢木都得，密度越高嘅實木效果越好，當中以黑檀木密度最高。小藍即場將黑檀木釘同桃木釘放入水杯，前者即刻沉底，後者浮喺水面。佢話黑檀木嘅價錢比其他木貴好多，以一個闊四呎三層Hi-Fi架，黑檀木賣46,000元；次一級花梨木、雞翅木等賣15,000元至22,000元；桃木、柚木賣6,000元至12,000元。想極級靚聲梗係將啲器材放喺黑檀木架，但係價錢真係幾貴，折衷買其他木材嘅架，或者係買啲黑檀木釘、木方等，擺喺器材下面吸音，一套三粒賣幾百蚊都幾受歡迎。
逢周五刊出