計我求大俠話齋，「出得嚟行」並唔係「預咗要還」，最緊要就係有頭有面「夠照」。要數到今季英超最「夠照」嘅人，就肯定係車路士新任領隊史高拉利。「大菲」一嚟到車仔，開頭都驚留唔住班球星，不過講吓講吓而家連林柏特高薪續約，仲發表埋「掛靴宣言」，「大菲」你係得嘅！
自從摩連奴宣佈執教國際米蘭之後，好多人都話林柏特同杜奧巴呢啲「摩連奴系」嘅球員會跟住去埋意大利。不過繼早前留住杜奧巴之後，中場靈魂林柏特都宣佈咗會續約，睇得出「大菲」嘅江湖地位真係唔少嘢，認真「夠照」。
據一啲英國傳媒報道話，林柏特呢次續5年嘅長約，周薪仲係車路士陣中最高嘅15萬鎊（約230萬港元），比起施治同埋艾辛等其他主力足足高出一倍，所以話有錢使得鬼推磨都係啱嘅！不過呢份巨額合約都可以話值得，因為林柏特作為英格蘭國腳，可以維繫陣中嘅「土炮」，更加係車路士近年嘅代表人物，冇咗佢係度真係爭好遠。
簡安話羅賓奴會來投
林柏特成功袋走張肥美合約，佢就好明確表示會喺車路士掛靴：「我同車路士之間雖然傾咗好耐先續到約，但諗吓諗吓我都已經三張嘢㗎啦，所以我最後都決定簽呢一份長約，而我都計劃會係車仔收山嘅。」
留得住林柏特梗係令一眾車迷開心，但所謂好戲在後頭，行政總裁簡安就話羅賓奴嘅轉會都仲斟緊，如果羅賓奴同皇馬傾唔掂數就會即刻嚟史丹福橋，各位車迷拭目以待啦！