晚晚在電視劇《當狗愛上貓》中看到羅嘉良飼養的唐狗小巴拍廣告、做PR（公關）狗，身兼多職，但到底PR狗的工作範疇及入職條件是甚麼？曾修讀Marketing、擁有標致面孔兼Talk得兩嘴就可以入行？當狗遇上大結局，碰上的就是一種機遇，讓四隻真正PR狗上上鏡，告訴大家何謂稱職的公關狗。
記者：蘇麗珊
攝影：伍慶泉、陳盛臣
鎮守Salon 剪髮唔係剪毛
儍更更的鬆獅狗阿扁是店主兼主人Fred送給女友的禮物，自4年前SaloonK髮型屋開業以來，阿扁就日日跟住主人返工招呼客人，甚至有人問這店是否替寵物剪毛！Fred說：「阿扁係PR之餘，更係實Q。」客人甫入店阿扁就由頭聞到落腳，搜一搜身。儍頭儍腦的外貌贏得不少Fans歡心。「好多客會專登買狗零食探佢，又或者帶埋寵物嚟剪髮。」
二號殺手老虎狗蚊蚊似足《阿笨與阿占》的阿占，必殺技是大嘴巴及口水。採訪當日牠「垂涎三尺」的模樣已令我捧腹。當客人感受阿扁的儍氣、蚊蚊的唾液後，最後一棒來到凱恩嗲利飛飛，「飛飛一見客就自轉同繞客人打圈轉，非常好客。」
PR狗冧客 最緊要識HandHand
據Fred表示三隻PR狗雖然性格不同，但牠們的共通之處都是性格友善。Fred補充：「佢哋無經過特別的狗隻訓練，但就懂得示範基本指令，如畀手、坐低等。」簡單幾招動作已甚得少女、小朋友歡心。
SaloonK（28702702）
中環九如坊2B舖
電器店賣溫馴 堂堂PRManager
有的PR熱情如火，有的PR溫和有禮，大概負責旺角電器店的金毛尋回犬Coffee屬於後者。每每經過旺角西洋菜南街、近始創中心一段，總看到Coffee在門外睇舖。本為治療皮膚病而於7年前跟隨主人落舖的Coffee，由於日漸多人認識，故老闆也特意為牠製作「PRManager」的職員證以資識別。店舖經理Alan說：「Coffee唔似一般狗周圍吼人，好多途人見到佢親切嘅樣都會專登入嚟睇電器。」Alan亦表示Coffee最愛附近茶餐廳的牛油味紙包蛋糕，不少熟客也會買這款手信來探班。當我們為Coffee拍攝「睇舖」照時，多句「隻金毛好得意呀！」徘徊耳邊，可見Coffee的魅力指數甚高。
環球電器燈飾公司（23938383）
旺角西洋菜南街214號地下