新一季英超周六開鑼，過往買人好似唔使本嘅車路士同曼聯，暫時都唔及得上利物浦同熱刺咁豪氣；周六利物浦同熱刺齊齊領兵北上，睇吓錢係唔係萬能，幫佢哋旗開得勝。文：牽牛、藍血人
利物浦季初一路想撬維拉中場巴利，不過一直唔肯加價，最後調轉槍頭，收購熱刺前鋒羅比堅尼，同費蘭度托利斯組成雙快馬前鋒線。
紅軍快馬鋒線捕「貓」
利物浦用咗1,900萬鎊收購羅比堅尼，暫時係英超今季最高轉會費收購，呢位「機關槍」真係唔講得笑，猶如英球壇浪人，由狼隊出道，踢過高雲地利、國際米蘭、列斯聯及熱刺，今次又到西北部搵食，加盟利物浦；列斯聯屬北部球隊，今次有羅比堅尼帶隊，紅軍一班新兵好似杜辛拿、尼高治、廸亞高卡華利尼，肯定唔怕蕩失路。不過今次羅比堅尼就要遇上堅尼領軍嘅「黑貓」新特蘭；當堅尼遇上堅尼，戰果又會係點？
熱刺近季都係洗腳唔抹腳，領隊拉莫斯決心換血，簽入賓尼、莫廸歷、靴里奴高美斯及杜斯山度士，件件身價都唔少嘢，雖然都放走羅比堅尼、保羅羅賓遜呢啲前朝球員，不過論支出，熱刺係目前英超花費最高球隊；當然老闆使得錢，球員就賣力啲，熱刺季前熱身賽5連勝，剛剛更大勝羅馬5蛋；羅馬假假地都係上季意甲亞軍兼歐聯8強，咁熱刺仲得了？
提防熱刺由龍變蛇
不過，記性好嘅球迷都會記得，上季熱刺季初熱身賽又係打到識飛，結果英超開鑼第一戰作客「升班馬」新特蘭，諗住坐定粒六，結果呢？0:1畀新特蘭搞掂；熱刺呢次又作客北部，對住米杜士堡，唔會又輸咁蹺啩？
英超開鑼日精選戲碼
星期六21：米杜士堡對熱刺
周六10:00pmnow631台直播
星期六53：新特蘭對利物浦
周日0:30amnow632台直播
落難總理有心情睇波？
阿士東維拉vs曼城
前泰國總理他信，上周五欣賞完京奧開幕禮後就成為通緝犯，因為佢缺席泰國法庭嘅聆訊，俾泰國通緝，不過佢同老婆大人已經飛到英國尋求政治庇護；英國畀唔畀佢留國仲未知，不過他信都當曼城係佢護身符之一；英超開鑼戰曼城作客維拉，大家睇吓呢位落難總理重有冇心情入場睇波。
新費Sir門徒第1擊！
愛華頓vs布力般流浪
繼布魯士、曉士及堅尼後，今季再有費格遜麾下球員，成為英超領隊，佢就係昔日曼聯中場悍將恩斯；恩斯英超領隊處子作就要作客愛華頓；布力般唔開水喉畀恩斯不特止，連中場賓尼都要賣去熱刺，門將用上季熱刺打到慌失失嘅羅賓遜，真係要祝恩斯好運。
紐記又食曼聯幾多蛋？
曼聯vs紐卡素
11:1，係曼聯上季兩鬥紐卡素總比分；曼聯上季對住紐卡素，真係好似大人同細路仔打波咁，首回合主場先贏6粒，次回合作客都贏五個一皮，不過開鑼戰紐記又作客曼聯，遇上對手冇C朗、朗尼同拿尼，如果又被大炒，基瑾嘅紐卡素仲識唔識個醜字點寫？