英國安妮公主熱愛馬術，唔係新聞，佢係國際奧林匹克委員會委員，八月八日到北京參加北京奧運開幕禮，與胡錦濤合照，出席國宴之後，就飛咗嚟香港睇奧馬。可惜安妮公主嘅千金ZaraPhilips因座騎受傷，退出奧馬，否則英國皇室成員出場嘅話，勢必吸引大量國際傳媒來港。
安妮公主與夫婿訪港，八月十一日早上到雙魚河觀賞越野障礙賽，早上賽事有四名選手墮馬，包括中國靚仔選手華天在內，幸無大礙。唔知係唔係有公主臨場打氣，英國隊表現甚佳，搶分升上第三名，保存爭牌希望。
公主觀賽之後，中午十二時左右就到咗屯門騎術學校，為傷健策騎會嘅傷健騎手打氣。幾位傷健騎手有老有嫩，以兒童居多，騎上馬背表演指定動作，公主就由會長陳祖澤及主席楊國琦陪同，不怕微雨及泥濘，步入馬圈內與騎手談話，據講語多鼓勵之詞。傷健策騎協會為身體有缺陷兒童提供騎馬治療，透過騎在馬背上之動作，讓傷健人士與馬匹互動，培養及提升傷健人士嘅自信心及肢體動作。左丁山見到一班兒童騎馬，十分活潑可愛，問站在身旁嘅權威醫生K：「究竟呢幾位細路有何缺陷？」醫生K話：「全部都係天生痙攣，影響手部足部不能如常人般運作，但對大腦無影響，佢哋騎馬作物理治療，效果幾好。」醫生K嘅左邊有一位K女士，原來係物理治療專家，同時又係用馬匹作物理治療嘅專家，如此專才，香港罕有，唔怪得安妮公主與佢談話時，問多幾句。其後公主與各家長輪流閒談，先至離開，整個巡視─會面，為時約六十分鐘，簡單、利落。若果時光倒流，回到彭定康掌管香港時期，安妮公主到屯門騎術學校參觀嘅話，場面與隆重程度，相信或會大十倍以上。𠵱家時勢唔同，安妮公主低調訪港，無記者追隨，佢之會到騎術學校與傷健策騎學員見面談話，當然唔係做騷，只係表現出佢對騎術之熱心及對兒童學員之關懷而已。