前晚出席Fendi時裝騷的嘉賓，男子組以古天樂和黃偉文（Wyman）為代表，穿上秋冬新裝的古仔，瘦了不少，他表示忙於與任賢齊拍攝新片《暗殺》，他說：「因為拍戲着冬天衫，又冇時間瞓覺，每日淨係食一餐，都瘦咗20至30磅，成隻手冇晒肉，都唔敢去磅重，套戲都拍咗半年，之後又有新戲開。」記者笑他工作忙，無暇成家立室，他笑說：「咁忙，梗係冇時間，如果抽到時間，同屋企人去一個禮拜旅行已經好好。」
Wyman：被困北京
此外，一向鍾愛Fendi男裝的潮人Wyman，透露早前到北京無緣看奧運開幕是一個釋放，他笑說：「釋放咗，之前去覺得好難得，不過收咗20幾頁紙嘅守則，好有心理壓力，自己都有嘗試去睇晒，之後想8號走又飛唔到，真係英雄被困北京，鳥巢味都未聞過，焗喺北京放假。」