由詹瑞文一人演出的棟篤笑舞台劇《男人之虎》，將於10月30日起第九度重演，總演出場數達150場，打破了香港棟篤笑舞台劇紀錄，這次《男人之虎》命名為「喪打通脹版」，實行在加價熱潮下減價益街坊。詹瑞文更有意將此劇拍成電影，並考慮邀請其學生如梁洛施、林嘉欣及曾合作的蔡卓妍（阿Sa）反串演出。
三年半前香港無論經濟及政治環境均不濟，市民怨氣甚重，當時適逢詹瑞文踏入四字頭的年紀，他基於一種慾望、基於心裏一句：「我唔想再係咁啦！」因而創作了《男人之虎》一劇，他說：「當時香港環境真係好差，自己又面對40歲嘅階段，身邊成日聽到好多人講『我唔想再係咁啦』呢句說話，呢句話係源於人有慾望，於是我就依照呢個方向創作咗《男人之虎》。」
阿詹指《男人之虎》第一次公演時備受批評，有人指此劇嘩眾取寵及浮誇，他說：「初時好多人覺得我表演時講粗口係想嘩眾取寵，其實粗口唔係大家想得咁負面，我都係配合番個角色先講。後來好多觀眾睇過就介紹畀身邊嘅朋友，接住有名人有藝人嚟睇，大家就留意多咗，由批評變成讚揚。」眼見《男人之虎》的入場人次越來越多，阿詹感到很滿足，因為大家都認為該劇內容緊貼香港人生活，充份表現出香港人精神。
阿詹反串扮女人
今年阿詹打算將《男人之虎》搬上大銀幕，將它拍成電影，舞台上只有他一個人演出，但要變成電影的話，則需有其他演員配合，故此他考慮邀請其學生如林嘉欣、梁洛施、徐子珊或是曾合作拍電影的蔡卓妍客串演出。
阿詹說：「我以友情價叫佢哋幫手，不過唔知佢哋答唔答應，因為喺戲入邊佢哋全部要反串做男人，而我就做女人。」此外，阿詹更希望將此劇帶到珠三角，屆時他會將內容稍作更改，以迎合不同地方的觀眾口味。
採訪：李珮洳 攝影：陳俊強
