導演唐季禮當年搵林心如拍電影《雷霆戰警》而傳出緋聞，呢段緋聞傳咗好多年，兩人亦都被傳媒踢爆拍拖約會，但當事人一直都冇認過拍拖，不過佢哋已經被外界認定係一對。
但近日有消息指唐季禮同林心如已經分手，日前就有內地傳媒影到唐季禮同一個少女喺佢北京寓所樓下嘅餐廳食飯，據內地傳媒形容嗰位少女年約20歲左右，樣貌清秀，外表好清純，似足一位大學生。報道仲話唐季禮同個女仔喺寓所一齊落嚟，之後一齊走進寓所樓下嘅餐廳，兩個人揀咗靠窗嘅位置坐低後，開始慢慢嘆枱上嘅午餐。
唐季禮同個少女邊食邊傾，顯得相當熟絡，講到興奮嘅時候，兩個人仲你眼望我眼咁一齊笑，食完飯之後唐季禮首先走出餐廳，之後個少女先出嚟自己坐車離開，而唐季禮就去附近嘅超級市場，買咗啲零食同杯麵返上屋企。
坦言甚少聯絡
至於林心如早排接受台灣傳媒訪問時，就話同唐季禮已經好少聯絡，仲話自己係單身，睇嚟呢段戀情真係危危乎！