Freeze三個靚女三對大眼睛，點解一講撞鬼就得番甄穎珊一個？Carisa鬼聲鬼氣話：「唔係……係我嘅遭遇特別恐怖，嘿嘿……」Carisa最愛仿古車，以前曾經同前男友擁有過一部光岡Viewt，有晚佢揸住部Viewt出街食飯，成十二點幾先攞車返屋企，途中，電話響起，「喂，123呀？（甄穎珊花朵）你係咪喺尖沙嘴呀？我哋啱啱飲完嘢，我個Friend失戀飲酒貓咗呀，你過嚟兜埋我哋啦。」Carisa好心，即飛回老尖天文台道接朋友，無耐，離遠見到兩個人影，一個係佢個FriendA，另一個女仔佢唔識嘅，應該係貓咗嗰個失戀女Ｂ。
Ａ一上車攤直：「唉，B係咁逼我飲，我都飲到貓貓哋，攤陣先，佢住大埔㗎。」講完就不省人事，Carisa昅昅倒後鏡，「咦？點解B塊面無血色嘅，莫非飲完酒面青青？」行行行，去到吐露港，「嘩，唔係咁邪嘛，喺倒後鏡淨係見到A，B唔見咗。」心都寒埋嘅Carisa即時大叫，想嗌醒A，點知嗌極無反應，越行越驚，越驚越心急：「點解咁耐都未到人多啲地方㗎？嘩！臨轉入市中心，爭啲睇唔到紅燈，煞車煞到響晒胎，呢個時候望望倒後鏡，不得了！B成面血伸手埋嚟摸我呀。」最後點？「嘿嘿，事實B真係A個Friend，係人唔係鬼。」B喺倒後鏡消失，係因為瞓着咗又無戴安全帶，碌咗落座椅下面，俾椅背遮住，至於突然又出現，係因為Carisa嗰下煞車，搞到佢撞埋椅背流鼻血，佢伸手，係想問Carisa攞紙巾咋。
文：嘴嚼爺