邦民女Kama玩轉型，晚晚對住你唱《世界真細小》，甜爆笑渦冧盡𡃁界少男。最近連三星都搵佢代言旗下首部全高清DV，拍片、影相解像度超高，影日落連雲嘅層次都好豐富，一隻手指求其㩒都Cap到黃昏靚景！返到屋企直駁電腦即抄即Edit，駁埋PS3還原高清靚片都仲得，名副其實高清夕陽易借易還。好牽強、好爛Gag？呢期𡃁界興呀！
記者：徐影龍
攝影：譚盈傑
Model:Kama@elite
鳴謝：三星電子
唔手震全靠快閃
早排去過白泥影日落，可惜個天都唔鍾意我，微微細雨落個不停，交唔到差。今次約埋邦民女試機影相，老頂話翻啅無雷公咁遠嘅白泥黃昏景，我梗話好喇，難得獨霸Kama一整天陪我遊車河！
由於架車有GPS幫助，約半個鐘已順利入到流浮山，Kama口痕想掃街，佢一邊試食金桔、腰果，我就一邊用三星部HMX20C猛咁影，好彩部高清DV機仔細細，內置埋8GB快閃記憶體，跟市面一般DV用嘅硬碟式比較，勝在夠輕夠穩定，長長窄巷邊行邊影都唔會撞到人，而且Zoom掣符合晒手形，食指輕輕鬆鬆已玩到變焦，又或用指公快速切換拍片、影相模式，整個過程郁吓手指搞掂晒，等我另一隻手可以幫手試食。
三分鐘摸熟高清DV
𡃁界潮興自拍再擺相喺Blog度，Kama當然唔例外，拎部卡片DC影個不亦樂乎：「我部DC可以拍埋片㗎，不過效果麻麻。咦？你部DV影相咁清嘅？好犀利呀！」DC、DV一早已互撈過界，不過兩者始終各有強項，但三星呢部HMX20C玩全高清，不但FullHD拍1080p高清影片，就算轉做相機一樣有800萬像素，唔差得過Kama手上部卡片DC。HMX20C已達專業級，操控上卻出奇地簡單，精髓全喺個2.7"輕觸屏幕上：「㩒吓個芒就得喎，邊個Icon睇片？哦，應該係呢個；邊個睇相？唔，應該係呢度……」Kama自問自答，三兩分鐘已摸熟部機，完全無我獻殷勤餘地。
規格表：
感光元件：640萬像素CMOS
影片解像度：最高1080p（25fps）
相片解像度：最高3,264×2,448
記憶體：內置8GB快閃記憶＋SD槽
屏幕：2.7"輕觸屏幕
體積：66×67.2×139mm
重量：456g
查詢：三星電子（36984698）
語音提示可專心揸車
去到白泥，手機網絡商已轉為中移動，可想而知呢度係幾咁隔涉！為順利到達，專誠向皇冠借咗架Picnic嚟遊車河，貪佢套新技術GPS夠可靠。其實之前已揸過兩次Picnic，不過路程不長，唔夠盡興，今番長途跋涉向新界出發，面對大量高速公路、隧道同小路，對一向為港人詬病嘅GPS，的確係一大考驗；由於第三度試車，對呢套GPS系統已有掌握，Set路線已得心應手得多，唔似上次咁踢腳；先喺灣仔接Kama、跟住去屯門接攝影師，再入流浮山、白泥，全程都好順利，齋聽GPS系統嘅提示錄音，燈位、十字路口轉彎等都好準確，已可安心駕駛，毋須分神望屏幕，專心揸車，變相令車程加快不少。
個人嚟講，對呢套GPS評價幾高，因為佢並非單靠衞星嚟導航，車內仲有輪胎轉動感應器計距離，兩者配合就克服到香港地高樓大廈嘅訊號問題。雖然暫時只預裝喺Picnic度，不過售價維持$198,900冇變過，即係套GPS係送畀你，換轉係Alphard350或Previa，就要額外花錢裝配，故令我對Picnic更為加分。
內櫳闊大似Previa
由性能到空間感，個人認為定位極似Previa，雖然不及Previa般有太多豪華設備，不過價錢差唔多平一半，兼且有埋GPS系統，一般小家庭相當啱使，尤其日常少揸嘅太太或女朋友，舞住架七人車都唔會雞手鴨腳。
內櫳亦值一讚，前、中排頗為闊落，充足空間感唔會令人覺得侷促，只嫌尾排仍係偏逼狹，呢點就較Alphard同Previa遜色喇，當然，喺售價同車身體積相衡下，呢啲已經唔算係缺點，除非你經常性坐足七個人啦。
1.順着三號幹線、往天水圍方向路牌行；
2.穿過天水圍嘉湖山莊，轉入流浮山道；
3.直入迴旋處便到達著名海鮮勝地流浮山；
4.向左駛直入到尾分別是上白泥及下白泥。
豐田Picnic精裝版：
引擎：1,998c.c.直4VVTI
馬力：163hp/5,000rpm
扭力：19.6kgm/4,000rpm
傳動：4前速自動波
查詢：皇冠車行（28661020）
直駁PS3睇高清
玩完一日返到屋企，只本着多此一舉心態，試試駁PS3有乜反應，卻驚喜地即時Connect得到，將三星部HMX20C辨認成一個儲存裝置，入面所有高清影片、相片統統睇得返！毋須Driver、改Folder名，一插即睇，Kama甜爆笑容喺屋企部42"Plasma度重現，真係好清好靚，拍住喺PSN下載嘅賈曉晨MV，連駁AVOut線嘅功夫都慳番！
