馮仁昭四圍超<br>離開娛圈遠走高飛 嘉玲爆偉仔驚人求婚宣言 - 馮仁昭

馮仁昭四圍超
離開娛圈遠走高飛 嘉玲爆偉仔驚人求婚宣言 - 馮仁昭

劉嘉玲上月終於同拍拖20年嘅梁朝偉結婚,喺印度度蜜月過後,嘉玲馬不停蹄飛咗去北京做嘢,不過佢日前接受吳君如主持嘅商台節目《嘩!嘩!嘩!打到嚟!2008》訪問,大講同偉仔相處嘅點滴,又大爆偉仔過去其實曾多次求婚。
整個訪問都表現得如沐春風嘅嘉玲,被君如問到偉仔當日係點樣求婚,嘉玲話:「其實偉仔熱戀時經常求婚。」但由於當時嘉玲仲未ready,所以一直都對結婚模稜兩可,直至出事後,偉仔再次同佢求婚,令嘉玲相當感動並憶述話:「佢同我講:『不如我哋結婚啦,我哋不如唔好再做呢行,一齊離開呢度啦』。」不過當時嘉玲覺得應該要面對現實,所以決定繼續留低。

劉嘉玲日前接受吳君如(左)嘅節目訪問,大爆偉仔曾多次求婚。

青霞(中)同嘉玲及偉仔私交甚篤,喺婚禮上係最開心嘅一個嘉賓。
資料圖片

青霞婚禮上心醉

提到結婚地點,嘉玲話今次婚禮選擇喺不丹舉行係緣份所致,當佢向偉仔提議時,偉仔都相當震撼,又將婚禮事宜全程交畀嘉玲負責。
講到結婚當晚情況,嘉玲指林青霞係咁多嘉賓入面最開心嘅一個,而且係最快醉倒,不過係心醉而唔係酒醉,嘉玲自己就整晚保持清醒,佢話:「因為我要記低當晚每一個片段,等第時可以回味。」
至於整個婚禮係咪如傳聞中花咗5千萬,嘉玲話遠低過呢個數目,但就強調婚禮呢個難忘回憶同朋友嘅祝福,已令佢覺得得到好多。