近期是本地上市公司業績期，特別是中資股業績特別多，純睇盈利增長，唔少中資股業績增長都頗為理想，例如之前因會計制度改變曾發出業績預警的鞍鋼（347），半年純利有24%增長，但股價在業績前已先跟大市下跌，業績後仍是繼續跌。
又好似前晚公佈業績的中海發展（1138），截至今年6月底止中期業績，半年純利31.85億元人民幣，增長44.4%，業績一出，昨股價即裂口大跌5%，雖然收市跌幅收窄至2.3%，表現仍然是較令人失望。
騰訊PE嫌太高
以目前市況，幾乎係絕無僅有唔使點跌嘅中資股，要數國內科網股騰訊（700），股價去年10月底創出72.8元新高，當不少中資股跌到散晒，騰訊在今年6月及8月都仲可以貼近呢個歷史高位，現價66元，仍然跌得唔多。騰訊昨收市後公佈半年業績，純利11.78億元人民幣，升88.6%，每股盈利65.7分，呢份業績表面增長唔錯，問題係大行如何演繹，以及現價往績PE逾70倍，預期PE斷估點都有40倍，咁高唔知頂唔頂得住。
業績真正有驚喜的，應該是一些本地薑股份，例如恒隆地產（101）全年純利131.6億元，升約1倍，扣除投資物業重估收益及有關稅項後，基本純利上升1.5倍至51.23億元，呢份業績基本唔差，淡市中應具一定防守性。
另一隻值得一提之股份是廖創興企業（194），公司截至6月底止半年純利3.46億元，同比大升1.27倍，不過若扣除投資物業公平價值收益4.34億元，業績只係普通，此股個多星期內由9元直插至7.65元，看來業績前已有人沽定先。