奧運火熱進行，滿城都係遊客，北京名店全聚德嘅烤鴨亦賣得火熱，可惜旺鴨唔旺股，全聚德喺內地股市竟然跌停板。
全聚德嘅股價自京奧開始，就隨內地股市潛水，到噚日短短4個交易日，累跌三成，仲係要連續4日都試過跌停板，由開幕前（7號）嘅53.5蚊人仔，到噚日收市得番36.9蚊。
股價連跌四日
據《北京晨報》講，奧運勁旺全聚德嘅生意，話晒都係中國名牌，好多老外都慕名幫襯，搞到喺北京嘅百年老店前，呢幾日成日排長龍，就連奧運村裏面啲烤鴨，晚晚8點前就賣晒。
烤鴨賣到咁火熱，散戶又點會諗到佢哋嘅「鴨股」會唱反調，同奧運概念股一齊插水。有啲之前喺網上吹捧呢隻股嘅散戶，家陣做咗網友箭靶。