「跳水皇后」郭晶晶再度奪金，大家唔止關心佢嘅戀情，亦好想知佢點用啲獎金同廣告收入。和訊網搵一男一女理財分析師幫京奧中國選手做理財分析，唔止郭晶晶，仲有身高同身家都係巨人嘅姚明，同一跑成名嘅「欄王」劉翔。其中率先幫郭晶晶做好投資組合建議。
個理財計劃係咁嘅，話晶晶年收入約1000萬人仔，女分析師建議，攞最多四成年收入，即係400萬嚟買樓，趁家陣內地房產市道調整，泡沫唔大，最好一次過畀晒，咁就唔驚房貸利率升咁話；但就唔建議佢買股票，話風險大，反而可以用四成收入投資債券同基金，甚至黃金都好喎。
專家教買重意外保險
男分析師就建議跳水皇后，將兩成手頭現金買人民幣理財產品或者國債、三成買債券基金同股票基金做長線投資，佢亦覺得買樓啱跳水皇后，尤其家陣房產市道下挫時買就最啱時機；仲建議郭晶晶買重千萬銀保額嘅意外保險。男分析師更加叫郭晶晶留錢畀下一代讀書。
華華睇真啲，嗰位男分析師得到國家認證，但係家陣美元升、人仔跌，仲叫跳水皇后買國債，梗係知佢錢多，所以要支持吓國家嘞。仲有郭晶晶退役睇怕都會嫁入豪門，乜佢認為霍家要個新抱留錢畀子孫讀書咩？