中國喺奧運攞嘅金牌數量節節領先，不過港股呢幾日嘅走勢就冇中國運動員咁爭氣，倒頭下跌不特止，仲越跌越甘，由禮拜一跌25點，急插至噚日超過300點。網友China好心水清，發現「（中國隊）金牌越多，（恒指）跌得越勁」。咁兩者係咪真係有關呢？都係嗰句囉──賭仔姓「賴」。
網友kbe話：「連跌4日，奧運開幕以嚟，中港未好過。」c12陰謀論話：「因為西人眼紅，搵股民出火，沽沽沽！」vrm1999就怨中央唔救市：「舉重威力無窮，托市手軟腳軟。」
舉重有力 托市手軟
新巴小牛就唱國歌為港股打氣：「起來，起來……一個上升裂口即將爆開。」」秒秒當先一於懶理，「睇奧運好過睇股市！國家𠵱家要贏多啲獎牌先，股市唔理住。」