自問對魚類認識不深，到酒家叫條老虎斑已經以為好架勢。剛開業的漁喜海上鮮，主打金邊方利，睇個樣貌似撻沙魚，唔講以為Cheap貨，經大廚指點先知錯得離譜，原來方利只有野生，非常矜貴。無知唔止我一個，問過食客一樣對方利一無所知，今勻真係有眼不識方利！
記者：王震遠
攝影：陳陶鈞
鱗細彈牙極鮮甜
未聽過方利鼎鼎大名的不止我一人，在場問了四個食客，只有一位答得出方利，認真羞家。方利在魚類中非常名貴，可說是魚中的貴族。跟方利同級的魚，有三刀、七日鮮等，都屬上價魚，每両平均要$50-$60。方利賣得貴當然有理由，原來方利多生長在鹹淡水交界，本港魚穫之中，多是在長洲撈獲。由於方利極難養殖，平常只能養一至二日，捕獲後如能養到三日已經要裝香還神。由於全為野生海鮮，不能養殖，數量自然少，而且除了魚價貴，方利的打理亦相當考功夫，養缸的水溫須要維持在攝氏11至12度，比起其他養缸的水溫低，同魚唔同命，貴族果然生活矜貴。出身富貴外，始終要有「食」力才能令食家趨之若鶩，方利肉身比較薄，膠質重所以肉質彈牙，口感幼嫩鮮甜，食客往往一試難忘。
「有得揀，你至係老闆」，這句說話套在漁喜海上鮮是最恰當不過。客人揀啱心水海鮮，以重量計算價錢，毋須再加任何醬油費用，幾啱香港人。食店主張一式兩味煮法，蒸、炒、煎、炸、燜、燉和焗，任君選擇兩味，有別與一般的海鮮酒家一碟只有一味，以後不用每次都清蒸那麼悶吧。
海方利兩食（油泡魚球、椒鹽炸魚骨）
（時價，一斤四両約$800至$900）
一味兩食，唔使餐餐食蒸魚咁悶。方利肉身較薄，第一種食法（前排）用油泡煮，先靠師傅刀功起肉，畀少少鹽同蛋白已經好夠味，魚肉入口鮮嫩，魚味好重夠彈牙；第二種食法（後排），原條魚骨用滾油炸到金黃色，非常香口，本應不能食的魚骨經油炸過後變得脆身，可以進食且魚味十足。
香煎水鹹鮮
（時價，視魚種而定，𩶘魚約$68條）
運用傳統中式煮法，先揀薄身魚浸在粗鹽中醃兩個鐘，等待魚肉入味，食用時再輕輕香煎，加薑去腥味。入口非常香口，煎得魚肉好香脆，感覺有少少似鹹魚，但鮮嫩好多。
原籠馬拉糕（後）$13.8
果子香葉角（前）$13.8
古法炮製馬拉糕，師傅自己手做麵種令其發酵，再用原籠蒸，入口份外鬆化；果子香葉角即茶葉果，由於用了蘋果葉一齊蒸，味道份外香甜。
干邑溏心皮蛋酸薑$38
賣相吸引的餐前小食，加少少干邑中和皮蛋表面石灰的味道，入口帶陣陣酒香，配合酸薑味十分獨特。
問題1：知唔知呢條咩魚？
問題2：知唔知條魚幾錢両？
David：
「真係唔知喎，係咪撻沙？」X
「$500一條啦。」X
林小姐：
「唔似撻沙喎！」X
「最多咪$15！」X
Catherine：
「係咪黃腳𩶘？」X
「約莫$10啦！」X
劉先生：
「我知啦，方利嚟呀嘛，係咪？」√
「$25啦！」X
自選全包海鮮宴指定餐牌任選八款菜式
每席$3,280（送紅酒2支及汽水6罐）/半席$1,680（送紅酒1支及汽水3罐）
漁喜海上鮮（28826001）
銅鑼灣京士頓街9-11號地下