本欄八月七日講及北京小辮兒不二價，一位讀者朱小姐來電郵云：
「拜讀了8月7日的專欄『小辮兒不二價』，對『拆哪』一詞有點謬見。本人祖籍上海，印象中這個詞是滬人罵人的一句話，頗粗俗，家中是絕不允許小輩說這種話的。依在下之愚見，可能是南北方言有別。另外，關於China的日文譯音『支那』一事，據家上長輩說那是東洋人對中國人的蔑稱（侵華戰爭時日本國內就以此稱呼在日的中國人），但近幾年看到有些中國人竟以此自稱，實在有辱國體。希望先生能夠以正視聽。」
「拆哪」一詞，源自中國建築新城市、新城鎮，到處拆建舊樓，在某些地方引起人民反彈、抗議，堅決不肯搬走，負隅頑抗，最後當然係不得不走。一啲為維權律師膽敢代表抗議人士，告上法庭，竟遭拘禁。現時北京市面有「拆哪」T恤出售，顯然係另類無聲抗議，如是上海粗口，更加係故意取其同音，以表不滿。
另一位澳洲讀者D來電郵談及CEPA准許本港會計師到內地簽署核數報告一事，驚住會影響佢嘅前途。讀者D現於澳洲攻讀會計，就快考到會計師牌照。既然你問年青會計師前途如何，左丁山不妨大膽講幾句，最近曾與資深會計師會面，退咗休嘅肥W話會計師多多唔夠，但年青有牌人士一定要識中文，肯入中國內地工作至得，淨係香港一個城市，唔會聘請咁多會計人員，佢話以前香港唔夠人用嘅話，佢間會計師樓會向倫敦、澳洲、美國班兵，抽調若干人手過嚟，但現在此路不通，一來外國亦非常缺人，二來外國年青會計師唔多識中文，所以會計行業人手短缺，十分頭痛。一位會長級人物就講到中國資格試極難考，希望年青會計師用功刨好中文，刨掂「內地稅務」與「內地經濟法」兩科，老一輩會計師就未必願意再刨書考試咯。故此D君如果考完澳洲CA，不妨回港發展，即使明年世界經濟增長放緩，未必陷入衰退，會計行業仍然不愁冇工做，如果唔係，香港咁多高考叻女邊度會爭住入會計系吖（按：大學會計系女生多過男生）。