由任達華擔任監製兼主演嘅電影《一半海水一半火焰》，成為「夏日國際電影節」嘅開幕電影，前晚喺圓方戲院舉行首映禮，任達華率領內地女星莫小奇同戲中演員，包括來自內地嘅海一天同香港嘅羅仲謙齊齊出席，不過導演劉奮鬥同另一男主角廖凡就冇出現。
「面部又腫又傷」
來自北京、現年26歲嘅女主角莫小奇，原來喺澳洲讀書，仲係金融投資碩士畢業，來頭唔小，今次係佢第一次擔正做女主角，不過就吃盡苦頭，原來莫小奇有場戲俾男主角廖凡狂打，佢話：「他用手腳真的打我，又拖又拉，眼、鼻和面又腫又傷，我都分不清流的是眼淚還是血，結果我要入醫院，但中途導演又叫我回去再拍，好慘。」
問到事前導演有冇要求佢同意，莫小奇直言話冇，問到會唔會覺得俾人呃，佢都話：「對呀。」不過佢話唔會告導演，佢覺得導演都係要求逼真，嗰一刻又冇擔心自己會唔會毀容，但塊面就腫咗成個星期，一直係咁用冰敷，要隔好多日先好轉。
華仔：我唔在場
講到莫小奇被人真打，任達華話：「林嶺東20年前都係咁，拍呢場戲時我唔在場，如果我喺度會阻止，我唔太主張，莫小奇真係好好。」另外，任達華俾人影到佢喺泰國曬太陽兼晒肚腩，佢話當時喺當地拍戲，角色要增肥，不過返咗香港兩個星期減番8磅，回復弗弗身形。任達華同太太琦琦日前去咗睇京奧開幕禮，佢哋仲順道四圍玩，琦琦形容北京氣氛好濃厚：「北京今次搞奧運好成功，身為中國人都好驕傲。」
