運動場上一分耕耘一分收穫，要攞金牌平日就要刻苦訓練。好似南韓射箭隊本屆賽事就囊括男女團體金牌，而且仲係支支中靶心，令對手輸得心服口服。到底有咩秘訣呢？
秘訣梗係唔係食高麗參或單眼皮啦！南韓《朝鮮日報》周一發表文章，透露南韓射箭隊6年非人訓練內幕，本判官睇完都打個冷震，唔怪得人人話佢哋都係現代后羿、李廣、養由基啦！首先，南韓隊紀錄晒所有選手出道以來嘅成績，再分析各人特點，作針對性操練。
教練苦心多奇招
所謂工欲善其事，必先利其器。南韓隊專門設計射箭戰衣，着上身硬綳綳，頸椎至條腰都直過電燈柱，人企得正眼都望得準啲。據講，連中國選手都紛紛「賣國」，要求國家認住「南韓製造」先好買，真係犀利啦！
至於戶外射擊訓練就殘酷過軍訓，為訓練女選手膽量，教練會喺側邊大喝或扮鬼扮馬，心血少啲輕則射歪，重則暈底反白眼；跟住又會放條蛇落選手件衫度，一郁就留下兩個血洞，務求做到泰山崩於前而色不變嘅非人境界。
過得以上幾關仲未係絕頂高手。教練仲會將箭靶10環和9環黃色部分以外嘅範圍切走，以加強訓練難度。有時仲會癲到企到靶心旁邊，考驗班神箭手嘅膽識同準確度。咁殘酷嘅6年訓練，真係抵南韓隊遠遠拋離其餘對手嘅。
百步穿楊淡淡定
本判官仲記得女團決賽，中國選手已經好犀利啦！點知到南韓選手一拉弓，「啾！」一聲中靶心，再拉弓又中；之後男團比賽，對住高高大大嘅意大利隊，南韓隊依然淡定有錢剩。電視機前嘅判官，終於明白咩叫做百步穿楊啦！