香港難得有奧運賽事舉行，左丁山相信此生只能在二○○八年八月親眼見到一次。即使中國人想效法美國，十二年內辦兩次奧運（一九八四洛杉磯、一九九六阿特蘭大），中央政府與市政府（譬如上海）是否再想花費四百二十億美元（《華爾街日報》估計數字）嚟辦多一次，大有疑問，西方國家亦唔想短時間內畀中國再威一次啫！另外，可以斷言，另外一個中國城市辦奧運嘅話，唔會再委託香港辦馬術賽。
既然如此，人一世，物一世，一於入場睇奧運馬術賽，上星期六晚睇夜場，因驚住入場安檢程序需時，下午五時二十分到咗大學站，行出去唔使三分鐘就上咗穿梭巴士（雙層巴士），六分鐘後到達沙田體育學院閘口，全部人要落車，跟大隊排隊入場，五時五十分入到場內，總共用咗三十分鐘啫，十分快捷。所謂安檢程序，與機場入閘差不多，大家都慣啦。原來六時過後大量觀眾到場，外邊排隊輪候時間要將近一個小時；是日公佈臨場人數超過一萬二千人，入場算係方便嘅嘞。一啲報紙記者冇新聞就自己做埋新聞故事，特登帶水，帶火酒，帶蚊怕水入場，沾沾自喜，批評奧馬安檢不嚴，易生危險，真係冇事搵事做，簡直浪費記者時間。真係要報導奧馬新聞，唔該就做多啲資料搜集功夫，學習如何觀賞馬術及報導參賽選手嘅技術高低啦。即使上BBC網站，照樣翻譯人哋嘅馬術賽報導，記者自己都會學到嘢，勝過自製故事。
早入場，做乜好？大量觀眾排隊買紀念品，排隊買快餐飲料（價錢幾相宜，五蚊一瓶清水，使乜帶水入場吖！），排隊影相，香港人好守規矩，秩序井然。比賽場內有表演，其實一啲都唔悶。日落之後，坐在觀眾席上，炎熱漸消，晚上九時左右，仲覺得有啲涼快㖭。比賽場地靠近城門河，沿河一直望到馬鞍山，一片平坦，並無熱島效應，相信係香港最接近市區嘅最理想馬術場地，觀眾入場座位，最好嘅係背近城門河一邊嘅看台（104區及以後），既少阻擋，又可以睇到大電視屏幕，左丁山坐在103區，視線有少許遮擋，睇電視冇咁清楚，遺憾也。