內地著名導演張藝謀擔任北京奧運開幕及閉幕禮嘅總導演，目前喺北京忙於準備閉幕禮，內地有網上消息指張藝謀年底會開拍一套以南京大屠殺為題材嘅電影名為《金陵十三釵》，呢套戲係改編自作家嚴歌苓嘅同名小說，預計喺明年底推出。嚴歌苓表示曾經同張藝謀喺北京見面，不過佢表示唔會擔任《金》片嘅編劇。