「韓國車無興趣呀？」N年前問，我會答：「無興趣。」今日我會答：「都揸得過㗎喎。」良心說話，揸過最新七座SantaFe後，自此對韓國車另眼相看，正在女仔人家都揸得起呢部大嚿SUV，跑山落海易Handle，怪唔之路面越來越多H字頭車行走喇。
記者：梁美甜
攝影：陳盛臣
模特兒：Iris、Bell（TheGroup）
N月前試揸HyundaiSonata2.4，當日狂風暴雨，部車畀到我舒服寧靜感覺，自此一洗逢韓國車必渣嘅印象，今勻試揸HyundaiSantaFe2.7，作三日兩夜長測，好想體驗呢部七人車究竟乜嘢料。甫入Showroom，視線即被大大部銀底紫色SUV吸引；上車，由長沙灣踩返將軍澳公司，雖然唔係繁忙時間，但龍翔道、觀塘道同環保大道依然勁多車，SantaFe2.7車長4,675mm，對女仔嚟講好大件頭，但好彩腰線低，窗同後鏡夠大兼覆蓋範圍廣，視野闊落清晰，無話揸到心慌慌。
呢部七人車配搭2.7公升V6引擎，馬力189匹，最高扭力248Nm，跑龍翔道，起步加速好嘈好吃力，唔通車重之故？望一望里數錶，啊，原來只行咗千零，仲咁新，副偈未Warmup。幫佢一把，毫不憐香惜玉瘋狂踩油，行車即時順滑兼靜晒。
扭軚靈活易操控
不得不讚呢部大嚿車好靈活，軚輕易操控，軚轉車身轉，輕易切線走位，加埋四輪驅動，上斜落斜夠穩定，一啲都唔受車重拖累，令我錯覺以為自己揸緊細車仔，呢勻真係刮目相看。揸到興起，唔客氣嘞，由將軍澳來回東涌跑幾轉，部車越踩越順，撻車加速唔會嘈餐死，成日聽前輩話車係要放膽踩油門Run吓，經驗之談所言非虛。
車身大，擔心泊位，個心硬係覺得唔夠位唔夠位咁，殊不知泊車話咁易，公司大大個露天泊車位，Easy；室內停車場逼逼夾夾要我左轉右轉前褪後褪，都OK，因為軚環轉向幅度大，身高視線廣，睇位無遮無擋。一般路面U-Turn，攞準啲位，隨時可以一手軚搞掂。好開心，𠵱家先知自己泊車咁醒，尤其係大車，邊個話女仔舞唔掂大嚿SUV，家陣我自信心滿瀉。
叫得做SUV，當然載人載物量高同操控性強啦，人多坐足七人都得，人少少摺合中、後排，騰出多啲空間置物出遊又得，啱晒時下年輕人當家庭車咁舞，加上SantaFe2.7外形唔老土，色水又靚，走馬路搶鏡好有Face，最盞係價位，三十萬有找，算抵玩啦。
HyundaiSantaFe2.7規格
引擎：2,656ccV6DOHC
馬力：188hp/6,000rpm
扭力：248Nm/4,000rpm
傳動：四前速半自動波，四驅
車價：$248,000起
查詢：現代汽車（34288288）