身為𡃁界女神，個身發光㗎嘛，邪靈點敢埋身？所以一問JaniceMan有無撞過鬼，佢就話Touchwood無，坐乜車都未撞過鬼，不過就喺朋友口中，聽過唔少關於車嘅鬼古。
大部份佢聽番嚟嘅鬼古，不外乎喺倒後鏡見到啲唔應該見到嘅嘢，事後時間同地點，又必定係夜麻麻行經偏僻地方賴嘢。反而以下呢個鬼古，佢覺得最恐怖。
話說男仔A同女仔B係情侶關係，閒時依依泣泣少不免。農曆七月附近日子，有晚佢哋約咗朋友入大埔BBQ，不過因為A遲收工，搞到凌晨一點先出發入大埔Join班Friend。去到一個燈位，見係紅燈，梗係停車等轉燈啦。熱戀中嘅情侶真係煩，停車短短分幾鐘，都忽然情到濃時口淡淡，要錫啖嘴仔先，蜻蜓點水式錫咗一啖，準備巴黎鐵塔反轉再反轉一刻，突然聽見咯咯咯三下敲窗聲，須知道當時四野無人，A望勻四邊都係樹林，個心即時寒一寒，想快啲開車閃，B都心知不妙，一味耷低頭唔出聲。唔知係咪驚得滯，盞紅燈好耐好耐都未轉，男仔諗緊唔知開唔開車好嘅時候，望一望盞燈，俾車睇嗰盞交通燈係紅燈，俾人睇嗰盞交通燈又係Keep住紅燈，咦？望真啲，盞燈個紅公仔，原來無咗個頭㗎，你都咪話唔邪。呢個時候，A忍唔住衝燈開車走，連BBQ都唔去直出旺角旺一旺人氣。
我心諗，人哋無咗個頭，梗係唔抵得你喺佢面前咀嘴啦……
文：嘴嚼爺
