內地股市係咁跌，散戶當然牙痛咁聲，不過，被內地稱為「保險業教父」稱號、美國國際集團（AIG）前主席格林伯格就唱反調，話中國跌市唔係壞事。呢位教父唔止精通保險業，對內地股市亦好有研究。CCTV2網站全球資訊榜嘅記者，問到呢位80高齡嘅教父點睇內地股市。
格林伯格話，內地股市有泡沫，擠啲泡出嚟，等股價去返合理水平，唔係壞事嘅。佢仲話，中國最大優勢係內需強勁，只要好好發展，足以撐起一眾上市公司嘅股價，所以即使內地股市跌，佢一啲都唔悲觀。
不過格林伯格提醒，中國市場首要穩定，唔可以再畀啲上市公司有「惡意圈錢的行為」，即係叫啲上市公司咪惡意吸水，成日配股攤薄晒散戶嘅股份咁話。佢呢番說話，贏晒散戶嘅支持。