廖碧兒近年狂接廣告和行騷，被喻為無綫金蛋，不過大多時候由她父親做柴可夫管接管送。不過碧兒近日的起心肝搵車代步，前日更到灣仔AlfaRomeo車行揀車，見她肉緊兩頭騰，又企又踎致春光乍洩，終於睇中一部價值約24萬元的新車。
在無綫芸芸花旦中，廖碧兒也算是小富婆，近年先後擔任多個廣告代言人，行騷機會又多，密密賺搵埋唔少。雖然經常由朝做到晚，一日踩幾場，但她甚少駕車，多數由廖爸爸親自開車接送，為免父親太操勞，據知碧兒已開始四出睇車。
新車約24萬
前日下午，碧兒現身灣仔告士打道的AlfaRomeo車行揀車，當時她淡施脂粉、打扮隨意，由一女伴陪同到達，在場車行經紀熱情招待她，但碧兒似早已睇中心頭愛，在一部價值約24萬元、Fiat500型號的白色陳列車前徘徊，見她細心研究車輛，一時竄入車廂揸軚盤，一時又踎低睇車鈴，其間還不慎洩春光。
半小時後，碧兒和經紀到櫃位共商買車程序，傾完一輪後她面帶微笑離開，偕女伴搭的士到銅鑼灣百德新街shopping。碧兒先去PatriziaPepe揀衫，並買下一件黑色衫，繼而去SeeByChloe，試穿了一件黑衫和粉紅色連身裙，最後又有斬獲，滿載而歸。
開心擦餐勁
睇完新車買完新衫後，碧兒意猶未盡，在微雨天氣下行到攰，遂與女伴到附近餐廳用膳，碧兒甫坐下便不停講電話，表現眉飛色舞。侍應端來麵包，她也開懷大吃，看來這陣子傳她和陳豪分手，又傳她因續約問題被無綫雪藏，心情也未受影響，依然豪氣。
採訪、攝影：娛樂突發組
