呂慧儀、曹敏莉、周美欣、今屆港姐冠軍張舒雅、亞軍陳倩揚同季軍馬賽等，噚日以嘉賓身份出席喺澳門舉行嘅《2008澳門小姐》記者會，同10位候選澳門小姐會面，呢次選美將會喺9月7號假澳門威尼斯人度假村酒店舉行，身穿低V吊帶裝兼露底裙嘅呂慧儀，更搶盡一眾佳麗風頭。
睇好中葡混血兒
張舒雅、呂慧儀同曹敏莉一致睇好5號中葡混血兒關安娜，曹敏莉大讚關安娜夠特別，佢話：「今次喺我第二次見佢哋，可能經過專人指導，我覺得佢哋畀人耳目一新嘅感覺，我仲覺得關安娜好特別，可能佢係中葡混血兒，好代表到澳門。」被指為熱門人馬嘅關安娜就話：「我覺得大家嘅機會好平均，我對自己都有信心，會盡力做到最好。」
呂慧儀被指搶去佳麗風頭，佢笑笑口否認話︰「點會呀！佢哋（佳麗）都着晒露膊裙！其實我覺得佢哋好淡定，我喺台上傾偈嗰陣，都有同佢哋講，要以平常心做番自己。」
